დაიწუნა თუ არა "როსსელხოზნადზორმა" ქართული ყურძენი - შემოსავლების სამსახურის განმარტება

ბიზნესი & ეკონომიკა - 10:15, 13 Oct, 2015

1840

რუსულ მედიაში გავრცელებულ ინფორმაციას იმის შესახებ, რომ საქართველოდან რუსეთში შეტანილი 35 ტონა ყურძენი რუსეთის სანიტარულმა უწყებამ დაიწუნა და უკან გამოაბრუნა, საქართველოს შემოსავლების სამსახური გამოეხმაურა.

„რუსეთის ფედერაციის როსსელხოზნადზორის ვებ გვერდზე გამოქვეყნებულ სტატიაზე, რომელიც შეეხება საქართველოდან 35 000 კგ ყურძნის წუნდებას ფიტოსანიტარიული სერტიფიკატის არასწორი შევსებისა და შეფუთვაზე ეტიკეტების არ არსებობის შესახებ, განვმარტავთ, რომ მიმდინარე წლის 1 ოქტომბერს, შემოსავლების სამსახურის საბაჟო დეპარტამენტს ფიტოსანიტარიული სერტიფიკატის გაცემის თაობაზე განცხადებით (საქონლის დასახელება - ყურძენი; რაოდენობა - 35 000 კგ; დანიშნულების ქვეყანა - რუსეთი) მიმართა გადამხდელმა. ფიტოსანიტარიული კონტროლის ყველა პროცედურა, მათ შორის ფიტოსანიტარიული სერტიფიკატის შევსება განხორციელდა სრულად - საქართველოს მთავრობის N427 დადგენილების შესაბამისად“- განმარტავს შემოსავლების სამსახური, უწყების ინფორმაციით მათ გადამხდელისგან აქვთ ინფორმაცია, რომ ამ ეტაპზე ტვირთი უკვე რეალიზებულია.

შეგახსენებთ, რომ დღეს რუსული მედიით გავრცელდა ინფორმაცია, რომ რუსეთის “როსსელხოზნადზორის” ნიჟნი ნოვგოროდის მხარის სამმართველომ რეგიონის ტერიტორიაზე საქართველოდან 35 ტონა ყურძნის შეტანა აკრძალა. რისი მიზეზიც საქართველოდან ჩატანილი ყურძნის შემოწმებისას გამოვლენილი კანონმდებლობის მოთხოვნის, კონკრეტულად კი კარანტინის წესების დარღვევა გახდა. ამასთანავე რუსული მედიის ინფირმაციით ყუთებზე, რომელშიც მოთავსებული იყო პროდუქცია, არ იყო მარკირება, ან მარკირებული იყო სხვადასხვა სახის ეტიკეტებით, რომლებიც წარმოშობის ქვეყანაზე განსხვავებულ ინფორმაციას შეიცავდა. ფიტოსანიტარულ სერთიფიკატში კი იყო შეუვსებელი ველები.

„როსსელხოზნადზორის“ განმარტებით, აღნიშნული დარღვევების გამო შეუძლებელი გახადა პროდუქციის მონაცემების დადგენა და მიღებულ იქნა გადაწყვეტილება ყურძნის აღნიშნული პარტიის შეტანის აკრძალვის შესახებ.