მარჯანიშვილების სახლ-მუზეუმში თეატრალური „ნათლობის“ სიმბოლური რიტუალი შესრულდება

საზოგადოება - 13:31, 12 Oct, 2015

689

მარჯანიშვილების სახლ-მუზეუმი საქართველოს შოთა რუსთაველის თეატრისა და კინოს სახელმწიფო უნივერსიტეტის პირველკურსელების ფიცის დადების საიუბილეო, VII ცერემონიას უმასპინძლებს. 2008 წელს კომპანია „რედიქსის“ ინიციატივით აღდგენილი თეატრალური „ნათლობის“ სიმბოლური რიტუალი სამშაბათს, 13 ოქტომბერს, 14:00 საათზე, ყვარელში, მარჯანიშვილების სახლ-მუზეუმში ჩატარდება.

80-იან წლებში, თეატრალურ ინსტიტუტში შექმნილი ფიცის დადების ლამაზი ცერემონია პირველ ხანებში თელავსა და ყვარელში, კოტე მარჯანიშვილის სახლის მარანში იმართებოდა. მიტომაც გადაწყდა მივიწყებული ტრადიციის აღდგენა ყვარლის მუზეუმში, მარნის სცენაზე, სწორედ იმ ადგილას, სადაც კოტე მარჯანიშვილი თავის პირველ სპექტაკლებს დგამდა. ხანგრძლივი პაუზის შემდეგ უცვლელად შენარჩუნდა ხელახლა დაბადებული რიტუალის შინაარსი: დღესაც, ისევე, როგორც 30 წლის წინ, სტუდენტები ერთხმად დებენ ფიცს, რომ პასუხისმგებლობით მოეკიდებიან საკუთარ პროფესიას და ერთგულად ემსახურებიან სამშობლოს. ღონისძიების კულმინაცია გრიმის ცხების მომენტია, როდესაც ცნობილი და ყველასთვის საყვარელი არტისტები ახალბედა მსახიობებს სახეზე აცხებენ სასცენო გრიმს, როგორც გარდასახვის სიმბოლოს.