საქართველოს პრეზიდენტი ანკარაში ტერაქტის დროს გარდაცვლილთა ოჯახებს სამძიმარს უცხადებს

საზოგადოება - 16:02, 10 Oct, 2015

1376

საქართველოს პრეზიდენტი გიორგი მარგველაშვილი შეშფოთებას გამოთქვამს ანკარაში მომხდარი ტერორისტული აქტის გამო

„შეძრწუნებული ვარ თურქეთის რესპუბლიკაში, ქალაქ ანკარაში განხორციელებული ტერორისტული აქტის გამო, რომელსაც ათეულობით ადამიანის სიცოცხლე შეეწირა.
საქართველოს ხელისუფლება და ხალხი ცალსახად გმობს ტერორიზმის ნებისმიერ გამოვლინებას. ჩვენ, საერთაშორისო თანამეგობრობასთან ერთად ვაგრძელებთ ბრძოლას თანამედროვეობის ამ ერთ-ერთი უდიდესი საფრთხის წინააღმდეგ.
ამ განსაცდელის ჟამს ქართველი ხალხისა და პირადად ჩემი სახელით, ვუსამძიმრებ დაღუპულთა ოჯახებს, მტკიცე თანადგომას ვუცხადებ თურქეთის ხელისუფლებას და თურქ ხალხს“ - ნათქვამია პრეზიდენტის განცხადებაში.

ანკარაში მომხდარი აფეთქებების შედეგად გარდაცვლილთა რიცხვი 30-მდე გაიზარდა. დაშავებულია 120-ზე მეტი ადამიანი.

მედიის ცნობით, ასაფეთქებელი მოწყობილობები რკინიგზის სადგურის ტერიტორიაზე პროფკავშირების მიერ ორგანიზებული სამშვიდობო მიტინგის დაწყებამდე ცოტა ხნით ადრე აფეთქდა. მიტინგი სახელწოდებით "შრომა, მშვიდობა, დემოკრატია" ძალადობის წინააღმდეგ იმართებოდა.
მიტინგში მონაწილეობის მიღებისკენ მოსახლეობას "ქურთისტანის მუშათა პარტია" მოუწოდებდა.

შემთვევის შესახებ დამატებითი დეტალები ჯერჯერობით უცნობია, თუმცა არსებობს ვარაუდი, რომ ტერაქტი თვითმკვლევმა ტერორისტმა მოაწყო.