"ერთგვარი ვაჭრობა შედგა" - სფფ-ს დელეგატი სკანდალურ ვიდეოზე

საზოგადოება - 15:17, 10 Oct, 2015

3639

ფეხბურთის ფედერაციის არჩევნების დღეს გადაღებულ სკანდალურ ვიდეოკადრებს, საიდანაც ირკვევა, რომ რეზი არველაძემ ფედერაციის პრეზიდენტობა მისი დაკავებული დელეგატის გათავისუფლების სანაცლოდ დათმო, ფეხბურთის ფედერაციის ყრილობის დელეგატი გიორგი ხაჩიძე გამოეხმაურა.

მისი თქმით, შეხვედრაზე "ვაჭრობა" მიმდინარეობდა.
"მოგეხსენებათ, რომ რეზი არველაძე, მათ შორის ჩვენც უარს ვაცხადებდით არჩევნებში მონაწილეობის მიღებაზე, სანამ გეგა გობეჯიშვილი არ იქნებოდა გათავისუფლებული. მათი შემოთავაზება, მოთხოვნა იყო, რომ მივსულიყავით შეხვედრაზე და უეფას ვიცე პრეზიდენტი, გრიგორი სურკისი იღებდა პასუხისმგებლობას, მან ალალად თქვა, რომ ქვეყანას მანამ არ დატოვებდა, სანამ გეგა არ იქნებოდა გამოშვებული" - აღნიშნა ხაჩიძემ.
"ნაციონალური მოძრაობის" წევრმა გივი თარგამაძემ სოციალურ ქსელში ფეხბურთის ფედერაციის არჩევნების დღეს გადაღებულ სკანდალურ ვიდეოკადრები გაასაჯაროვა.
ცნობისთვის, გეგა გობეჯიშვილი ფეხბურთის ფედერაციის არჩევნებამდე ცოტა ხნით ადრე ნარკოტიკული საშუალების მოხმარების ბრალდებით დააკავეს.
მოგვიანებით თბილისის საქალაქო სასამართლომ გეგა გობეჯიშვილი 500 ლარის ოდენობის ჯარიმის სანაცვლოდ გაათავისუფლა.

თუმცა, უეფას გადაწყვეტილებით, გეგა გობეჯიშვილს სფფ-ს საპრეზიდენტო არჩევნების ყრილობაში მონაწილეობა არ მიაღებინეს.