"დაშავებულთა და გარდაცვლილთა შორის ქართველები არ არიან"- საქართველოს ელჩი თურქეთში

საზოგადოება - 15:01, 10 Oct, 2015

5336

თურქეთში საქართველოს საელჩოსთვის საქართველოს მოქალაქეებს დახმარების თხოვნით ჯერჯერობით არ მიუმართავთ.
როგორც თურქეთში საქართველოს ელჩი ირაკლი კოპლატაძე აცხადებს, ბოლო ინფორმაციით, აფეთქებების შედეგად დაშავებულთა და გარდაცვლილთა შორის საქართველოს მოქალაქეები არ არიან.
"ამ დრომდე მიმდინარეობს გარდაცვლილების იდენტიფიცირების პროცესი. ჯერ მათთვისაც არ არის ცნობილი გარდაცვლილთა ვინაობა. იმედი მაქვს, რომ მათ შორის საქართველოს მოქალაქეები არ იქნებიან. ამ მომენტისთვის, არც დაშავებულებში და არც გარდაცვლილთა შორის ჩვენი მოქალაქეები არ არიან", - აღნიშნა ელჩმა ირაკლი კოპლატაძემ.

თურქეთის დედაქალაქში ორი აფეთქება რამდენიმე საათის წინ მოხდა. ანკარაში მომხდარი აფეთქებების შედეგად გარდაცვლილთა რიცხვი 30-მდე გაიზარდა. დაშავებულია 120-ზე მეტი ადამიანი.

მედიის ცნობით, ასაფეთქებელი მოწყობილობები რკინიგზის სადგურის ტერიტორიაზე პროფკავშირების მიერ ორგანიზებული სამშვიდობო მიტინგის დაწყებამდე ცოტა ხნით ადრე აფეთქდა. მიტინგი სახელწოდებით "შრომა, მშვიდობა, დემოკრატია" ძალადობის წინააღმდეგ იმართებოდა.
მიტინგში მონაწილეობის მიღებისკენ მოსახლეობას "ქურთისტანის მუშათა პარტია" მოუწოდებდა.

შემთვევის შესახებ დამატებითი დეტალები ჯერჯერობით უცნობია, თუმცა არსებობს ვარაუდი, რომ ტერაქტი თვითმკვლევმა ტერორისტმა მოაწყო.