ბუდაპეშტის (ფანჯიკიძის) ქუჩის პირველ ნომერში არსებობა დაიწყო (უკვე ერთი წელია) უნივერსალური შესაძლებლობების მქონე ახალმა თეატრალურმა სივრცემ, გამორჩეული ექსტერიერით და ახალი სახეებით. „რკინის თეატრის“ დასს შეადგენენ ძირითადად ახალგაზრდები.

„რკინის თეატრი“ არის ახალი კულტურული კერა ძალიან საინტერესო არქიტექტურული ნაგებობით, რომლის ანალოგიც თბილისში(და არამარტო) არ არის. თეატრის კონსტრუქციულ ნაწილში გამოყენებულია 100 ტონამდე რკინა, რაც ერთობ არაორდინალურს და მიმზიდველს ხდის მას.

თეატრის დამფუძნებელი და სამხატვრო ხელმძღვანელია კოტე მარჯანიშვილისა და სანდრო ახმეტელის პრემიის ლაურეატი დავით ანდღულაძე.

„რკინის თეატრი“ რეჟისორმა დავით ანდღულაძემ ახალგაზრდა მსახიობებთან ერთად 2011 წელს ჩამოაყალიბა. თეატრის პირველი სპექტაკლი „სულ სხვა ოპერა“, ბრეხტის მოტივებზე, ქუჩაში, ღია ცის ქვეშ თამაშდებოდა. „სულ სხვა ოპერა“ წარმატებული ექსპერიმენტი აღმოჩნდა და დღემდე რჩება თეატრის რეპერტუარში. თეატრი იმთავითვე ეძებს განსხვავებულ თეატრალურ ენას მაყურებელთან შესახვედრად. ორიენტირებულია ახალი, ნოვატორული გამომსახველობითი ხერხების აღმოჩენაზე. მიმართავს თამამ ექსპერიმენტებს, რაც ხშირად ბადებს საინტერესო თეატრალურ ესთეტიკას. 2014 წლის 7 ივნისს „რკინის თეატრის“ ახალი შენობა გაიხსნა, რომელმაც ყურადღება მიიქცია თავისი უჩვეულო კოსტრუქციითა და სივრცის გადაწყვეტის არაორდინალური შესაძლებლობებით. მშენებლობა დიდი ხნის მანძილზე მიმდინარეობდა და ჯერ კიდევ არ დამთავრებულა.

რკინის თეატრში დრამატული სპექტაკლების პარალელურად ფუნქციონირებს ტელე თეატრი სახელწოდებით „TT”.

მიუხედავად თეატრის „ჩვილი ასაკისა“ იგი მონაწილეა რამოდენიმე საერთაშორისო თეატრალური ფესტივალისა. მათ შორის 2015 წლის მაისში მონაწილეობდა თურქეთის, ტრაბზონის, შავი ზღვის მე-16 საერთაშორისო თეატრალურ ფესტივალში.

თეატრის რეპერტუარში უკვე ორი სპექტაკლია: „სულ სხვა ოპერა“ და „ფერმა“, რომელსაც მთელი ოქტომბრის თვის განმავლობაში იხილავს მაყურებელი. სულ მალე თეატრი მაყურებელს წარუდგენს პრემიერას „სამანიშილის დედინაცვალი“.

საკონტაქტო ინფორმაცია:

rkinisteatri@yahoo.com

FB: რკინის თეატრი/The Iron Theatre

მისამართი: ფანჯიკიძის(ბუდაპეშტის) #1

ანა კვინიკაძე, საზოგადოებასთან ურთიერთობის მენეჯერი

592120815