აჭარაში განვითარებული სტიქიური მოვლენებთან დაკავშირებით აჭარის მთავრობაში საგანგებო ბრიფინგი გაიმართა. რეგიონის ადმინისტრაციულ ორგანოებთან ურთიერთობის დეოპარტამენტის ხელმძღვანელის კახა შაშიკაძის განცხადებით, აჭარაში მოსული უხვი ნალექის გამო რეგიონის სხვადასხვა მუნიციპალიტეტში განვითარდა სტიქიური მოვლენები. განსაკუთრებით დაზარალდა ქობულეთი. მუნიციპალიტეტის გამგეობაში შექმნილი სტიქიასთან ბრძოლის შტაბი საგანგებო რეჟიმში მუშაობს.

არსებული მდგომარეობის პირადად გასაცნობად ქობულეთში დილიდან იმყოფება აჭარის მთავრობის თავმჯდომარე არჩილ ხაბაძე.

მუნიციპალიტეტის გამგებელი სულხან ევგენიძე საგანგებო შტაბის წევრებსა და სპეციალურ მობილურ ჯგუფებთან ერთად სტიქიის ეპიცენტრში არსებულ მდგომარეობას ეცნობა.

ამ დროის მონაცემებით ქობულეთში დატბორილია ჯავახიშვილის უბანი, გელაურის დასახლება, ბაზრის მიმდებარე ტერიტორია, სააავადმყოფოს უბნის ნაწილი, რუსთაველისა და დავით აღმაშენებლის ქუჩების დასაწყისი. მდინარე აჭყვას ადიდებამ გამოიწვია სოფლების ლეღვას, გვარას, კონდითის, გოგმაჩაურის, ზენითის, აჭყვისთავისა და ცეცხლაურის სასოფლო გზების დატბორვა. განვითარდა მცირე მეწყრული მოვლენებიც.

ადგილზე მუშაობენ სამაშველო და სპეციალური მობილური ჯგუფები, სპეცტექნიკის გამოყენებით ტარდება შესაბამისი ღონისძიებები. დამატებით მობილიზებულია მეზობელი რეგიონების საგანგებო სიტუაციათა მართვის ბრიგადები შესაბამისი აღჭურვილობით. პრევენციის მიზნით წყლის დონის დაკლებამდე შეზღუდულია ავტოსატრანსპორტო გადაადგილება ქობულეთის მუნიციპალიტეტში. გადაიდო სარკინიგზო მიმოსვლა ბათუმი-თბილისის მიმართულებით. დატბორვის გამო ქალაქ ქობულეთის ორ სკოლაში და მუნიციპალიტეტის სამ საბავშვო ბაღში შეწყვეტილია სასწავლო პროცესი. ძლიერი ქარის გამო რამდენიმე საცხოვრებელ სახლზე გადახდილია სახურავი.

სტიქიური მოვლენები განვითარდა ქედის მუნიციპალიტეტშიც. მდინარის ადიდების გამო დაიტბორა და დაიმეწყრა რამდენიმე ოჯახის სასოფლო სამეურნეო ნაკვეთები . ადგილზე მუშაობენ შესაბამისი სამსახურები. ქედის გამგეობის წარმლომადგენლები მოსახლეობიდან პირადად ეცნობიან არსებულ მდგომარეობას.

სტიქიის შედეგების დათვლა გამოდარებისთანავე დაიწყება.

აჭარის მთავრობა მიმართავს მოსახლეობას თავი შეიკავონ გადაადგილებისაგან და აუცილებლობის შემთხვევაში დარეკონ 12-ზე ან ცხელ ხაზზე ნომერით : 27-20-01.