კომპანია „ჯორჯიან უოთერ ენდ ფაუერი“, ზამთრის სეზონისთვის მზადებას უკვე შეუდგა. ამ მიზნით, ნოემბრის ბოლომდე, კომპანია რიგი ტექნიკური ღონისძიებების გატარებას გეგმავს.

„ჯორჯიან უოთერ ენდ ფაუერი“ ზამთრის პერიოდში დედაქალაქის სტაბილური წყალმომარაგების მიზნით, საპროფილაქტიკო და სარეაბილიტაციო სამუშაოებს ეტაპობრივად განახორციელებს. სისტემის მდგრადობისთვის განსახორციელებელ სხვადასხვა სამუშაოსთან ერთად, კომპანია წყალსადენის ქსელებზე დამატებით ჩამკეტ-მარეგულირებელ ურდულებსაც დაამონტაჟებს.

აღნიშნული სამუშაოების ჩატარება, ოქტომბერსა და ნოემბერში იგეგმება. იმ შემთხვევაში, თუ კონკრეტული ღონისძიება რომელიმე უბანსა ან ქუჩაზე წყალმომარაგების შეწყვეტას გამოიწვევს, მოსახლეობის ინფორმირება წინასწარ მოხდება, როგორც მედიასაშუალებებით, ასევე ინდივიდულურად, SMS-შეტყობინებების, კომპანიის ფეისბუქისა, ვებგვერდის მეშვეობით.