კომუნალური გადასახადების ვაუჩერს ყველა ოჯახი მიიღებს. ამის შესახებ საკრებულოს საფინანსო საბიუჯეტო კომისიის თავმჯდომარემ ჯაბა სამუშიამ განაცხადა.

მან ასევე ახალი ინიციატივა გააჟღერა, რომელიც ვაუჩერის სხვისთვის გადაცემის შესაძლებლობას შეეხება.

როგორც სამუშიამ განმარტა, იმ ოჯახებს, ვინც თვლიან, რომ ვაუჩერს არ საჭიროებენ, შეუძლიათ საკუთარი კომუნალური ვაუჩერი სოციალურად დაუცველებს გადასცენ.

„ვაუჩერს ყველა თბილისელი მიიღებს. ჩვენ გამოვდივართ ინიციატივით, რომ ოჯახებს, ვისაც ფინანსური მდგომარეობის გამო არ ესაჭიროებათ კომუნალური ვაუჩერი შეუძლიათ, უარი თქვან მათ მიღებაზე და ისინი სოციალურად დაუცველებს გადასცენ. თბილისში მცხოვრები არაერთი ოჯახი მოგვბაძავს. თითოეული მათგანის მხრიდან ეს იქნება სოლიდარობის გამოხატვა გაჭირვებული ადამიანების მიმართ“, - განაცხადა სამუშაიმ.

საკრებულოს უმრავლესობის გადაწყვეტილებას ოპოზიციაში ლოგიკურს უწოდებენ. როგორც უმცირესობაში ამბობენ, ამ გადაწყვეტილების შესასრულებლად საჭირო იქნება დამატებით 10 მილიონი ლარი. მათი ინფორმაციით, ამ ეტაპზე ბიუჯეტში ამის რესურსი არ არის. ისინი პრობლემას გადაწყვეტილების ტექნიკურად აღსრულებაშიც ხედავენ.

„მთელი წელი ვცდილობდით, რომ კომუნალური ვაუჩერი შენარჩუნებულიყო იგივე დონეზე, სოციალურად დაუცველებისთვის და გაჭირვებული ოჯახებისთვის. როგორც ჩანს ნარმანიამ გადაწყვიტა, რომ ვაუჩერი ყველას მისცეს. თუმცა აქ არის ერთი საკითხი - ამის განსახორციელებლად დედაქალაქის ბიუჯეტში დამატებით 10 მილიონი ლარია საჭირო. რამდენად შეძლებენ ამ თანხის მობილიზებას და რამდენად რეალურია ეს დაპირება, ეს კითხვის ნიშნის ქვეშ დგას. რაც შეეხება ვაუჩერის სხვისთვის გადაცემის შესაძლებლობის გაჩენას, ამაში განსაკუთრებული არაფერია. უბრალოდ სოციალურად დაუცველებს გარანტირებული მექანიზმი სჭირდებათ და მათი დატოვება სამუშიას, აბესაძის, პეტრიაშვილის და პავლიაშვილის იმედზე, გაუმართლებელია", - განაცხადა საკრებულოს ფრაქცია "ნაციონალური მოძრაობის" თავმჯდომარემ ირაკლი აბესაძემ.