გორის ყოფილი აგრარული ბაზრის მოვაჭრეები, ექსპრემიერის ბიძინა ივანიშვილის სახლთან საპროტესტო აქციების დაწყებას აანონსებენ. როგორც "ნიუპოსტს" ერთ-ერთმა მოვაჭრემ ლეილა აბდულოვმა განუცხადა, დაახლოებით 150 მოვაჭრე მილიარდელის სახლთან მას შემდეგ შეიკრიბება, თუ მათ სამართალდამცველები ბაზრის ტერიტორიას იძულებით დაატოვებინებენ.
სასამართლო გადაწყვეტილების მიხედვით მოვაჭრეები კერძო საკუთრებაში არიან შეჭრილები და მათი გამოყვანა უახლოეს დღეებში უნდა მოხდეს. ყოფილი აგრარული ბაზრის ტერიტორია უცხოელი ინვესტორების საკუთრებაა.
"თბილისში ვაპირებთ წასვლას, ივანიშვილის ბინის წინ, იქ სიკვდილიანობა იქნება თუ ომი იქნება, იქ გადაწყდება ყველაფერი. ხუთი შვილის დედა ვარ, რით ვაცხოვრო ჩემი შვილები? ვიღაც მოკვდება, ხელი გვაქვს აღებული ყველაფერზე კაცი, ქალი არ გვაინტერესებს"-აცხადებს ლეილა აბდულოვი.
მოვაჭრეებს სამართალდამცველებმა სასამართლო გადაწყვეტილების შესახებ უკვე არაერთხელ აცნობეს, თუმცა ისინი ჯერ-ჯერობით ტერიტორიაზე ვაჭრობას განაგრძობენ.
მასალის გამოყენების პირობები






