პარლამენტში 2016 წლის ბიუჯეტის დეტალური განხილვა იწყება

ბიზნესი & ეკონომიკა - 11:34, 06 Oct, 2015

1503

საქართველოს პარლამენტის კომიტეტებსა და ფრაქციებში 2016 წლის სახელმწიფო ბიუჯეტის განხილვა დაიწყო. ბიუჯეტის პროექტს დღეს საგარეო, დიასპორის და ევროპასთან ინტეგრაციის კომიტეტების გაერთიანებულ სხდომაზე განიხილავენ.

ფინანსთა სამინისტროს განცხადებით 2016 წლის ბიუჯეტი 3%-იან ეკონომიკურ ზრდაზეა გათვლილი . მომავალი წლის ბიუჯეტის შემოსავლები შეადგენს 8 მილიარდ 225 მილიონ ლარს.

მისაღები შემოსულობების, ისევე როგორც გადასახდელების მთლიანი მაჩვენებელი განსაზღვრულია 9 920.0 მლნ ლარის ოდენობით. სახელმწიფო ბიუჯეტის ასიგნებები განისაზღვრა 9 920.0 მლნ ლარის ოდენობით, მათ შორის: საბიუჯეტო სახსრები შეადგენს 9 110.0 მლნ ლარს, გრანტები 130.0 მლნ ლარს, ხოლო კრედიტები 680.0 მლნ ლარს.

სახელმწიფო ბიუჯეტში გრანტის სახით გათვალისწინებულია 255 მილიონი ლარი და აქედან 125 მილიონს გრანტის სახით ევროკავშირი გამოყოფს სხვადასხვა სფეროში რეფორმების განსახორციელებლად.

ბიუჯეტის პროექტის მიხედვით, წინა წელთან შედარებით 57 მილიონი ლარითაა გაზრდილი შრომის ანაზღაურების მაჩვენებელი და დაახლოებით 1 მილიარდ 500 მილიონამდე ლარს შეადგენს. ანაზღაურების ზრდა ძირითადად განპირობეულია საგანგებო სიტუაციების მართვის სააგენტოს თანამშრომლების ხელფასების დასაფინანსებლად, რადგან გასულ წლებში ეს უწყება ადგილობრივი თვითმმართველობის დაქვემდებარებაში იყო და ადგილობრივი ბიუჯეტებიდან ფინანსდებოდა, რაც შეიცვალა. ასევე, 20 მილიონიანი ზრდა განპირობებულია ცესკოს თანამშრომლების ხელფასებისთვის, რადგან 2016 წელს დაგეგმილია საპარლამენტო არჩევნების ჩატარება.

სახელმწიფო ბიუჯეტის პრიორიტეტულად პროგრამებად გამოყოფილია ხელმისაწვდომი ხარისხიანი ჯანდაცვა და სოციალური უზრუნველყოფა.