საქართველოს შეიარაღებული ძალების მე-5 ქვეით ბრიგადაში გარდაცვლილი ჯარისკაცის ოჯახი თვითმკვლელობას გამორიცხავს. თამაზ თამარაშვილი საკუთარ სახლში, დუშეთის რაიონის სოფელ გრემისხევში გუშინ გადაასვენეს.

როგორც გარდაცვლილის მეუღლე ამბობს, მის მეუღლეს თვითმკვლელობის მიზეზი არ ჰქონდა.

„გამორიცხულია, მას თავი მოეკლა. ეს არის სისულელე. იძახიან მძინარეს იარაღი გაუვარდაო. კაი ვთქვათ ასე იყო, რომ დაინახეს რომ დაიჭრა, სად იყვნენ იმ დროს პერსონალი? სისხლისგან რომ დაიცალა, მერე გადაიყვანეს საავადმყოფოში? როგორც გავიგე, როდესაც საავადმყოფოში გადაიყვანეს უკვე გარდაცვლილი იყო“, - ამბობს გარდაცვლილის მეუღლე "კურიერთან" საუბრისას.

საქართველოს შეიარაღებული ძალების მე-5 ბრიგადის სამხედრო ტერიტორიაზე, მე-5 ქვეითი ბრიგადის ჰაერსაწინააღმდეგო ასეულის, I კლასის რიგითი თამაზ თამარაშვილი გუშინ გარდაიცვალა. ჯარისკაცის გარდაცვალების ფაქტზე დაწყებულია გამოძიება. თამაზ თამარაშვილს ორი მცირეწლოვანი შვილი დარჩა.