სოფელ ნასაკირალის სკოლა თამარ სანიკიძის წინააღმდეგ - პოლიციამ მინისტრის მომხრეები დააკავა

საზოგადოება - 15:19, 04 Oct, 2015

4061

ოზურგეთის მუნიციპალიტეტის დაბა ნასაკირალში მცხოვრები ძმები შავაძეები, ოზურგეთის პოლიციამ ნასაკირალში, გასული კვირის ხუთშაბათს განვითარებული მოვლენების საფუძველზე დააკავა.

როგორც "გურიის მოამბეს" შსს-ს პრესსამსახურიდან აცნობეს, დაკავებულებს ბრალი (ს.ს.კ. 239 მუხლი) ხულიგნობაში ედებათ.

გასული კვირის ოთხშაბათიდან, ჩაშლილია სასწავლო პროცესი დაბა ნასაკირალში. ასეულობით მოსწავლე, მშობელი და მასწავლებელი სკოლის ეზოში არიან შეკრებილები და განათლების სამინისტროს გადაწყვეტილებას აპროტესტებენ. ისინი სკოლაში მინისტრ სანიკიძისგან გათავისუფლებული დირექტორის დაბრუნებას მოითხოვენ: "სანამ სპარტაკ გოგატაძე სკოლის დირექტორად არ დაბრუნდება და არ შეიცვლება გადაწყვეტილება, ნასაკირალში სასწავლო პროცესი არ გაგრძელდება".

აქციის მონაწილეები პროტესტის უკიდურესი ფორმების მიმართვაზეც საუბრობენ.

სპარტაკ გოგატაძე განათლებისა და მეცნიერების მინისტრმა თამარ სანიკიძემ თაღლითობაში დაადანაშაულა და ის თანამდებობიდან გენერალური ინსპექციის დასკვნის საფუძველზე გაანთავისუფლა.

თავის მხრივ გენერალური ინსპექცია სკოლაში დაბა ნასაკირალში მცხოვრები ძმები შავაძეების განცხადების საფუძველზე შევიდა.

შავაძეები სპარტაკ გიგატაძესა და სკოლის დირექციას საკუთარი შვილების დისკრიმინაციაში ადანაშაულებენ და ისინი პროტესტის ნიშნად სკოლაში თავიანთ ბავშვებს უკვე წელია არ უშვებენ.

აღსანიშნავია, რომ დაბა ნასაკირალში, სადაც 6 ათასამდე ადამიანი ცხოვრობს, დაკავებული ძმები ვაშაძეების გარდა, განათლებისა და მეცნიერების მინისტრის, თამარ სანიკიძის გადაწყვეტილებას, სკოლის დირექტორის თანამდებობიდან გათავისუფლების თაობაზე-ყველა აპროტესტებს.

თავად სკოლის დირექტორმა, სპარტაკ გოგიტიძემ კი, მინისტრის ამ გადაწყვეტილებას, ჩვენთან საუბარში, სკოლის დისკრედიტაციის მცდელობა უწოდა.

ცნობისათვის: სურათია გადაღებულია გასული კვირის ხუთშაბათს, მასზე დაკავებულებიდან ერთ-ერთი ძმაა აღბეჭდილი, რამდენიმე წუთში ის ოზურგეთის სასწრაფო სამედიცინო სამსახურმა ოზურგეთის საავადმყოფოში გადაიყვანა.

გავრცელებული ინფორმაციით, ერთერთი ძმა მოსახლეობასთან დაპირისპირებისას დაშავდა.

თეა იოსელიანი, გურია