საქართველოს ფეხბურთის ფედერაციის პრეზიდენტი ლევან კობიაშვილი გახდა

სპორტი - 21:26, 03 Oct, 2015

6298

საქართველოს ფეხბურთის ფედერაციის პრეზიდენტად ლევან კობიაშვილი აირჩიეს. 18-მა დელეგატმა მხარი დაუჭირა ლევან კობიაშვილს, ხოლო 15-მა - რევაზ არველაძეს.

სფფ-ს პრეზიდენტის არჩევნებზე ზუსტად ის სამი ხმა იქნა გადამწყვეტი, რომელიც ბოლო წუთებში იქნა გაუქმებული. არსებული ინფორმაციით სამივე დელეგატი რეზო არველაძის მხარდამჭერი იყო. მათგან ერთი გეგი გობეჯიშვილი, გუშინ გვიან ღამით საკუთარ სახლთან დააპატიმრეს, რომელიც დღეს მოგვიანებით ჯარიმის სანაცვლოდ გაათავისუფლეს.
მოგვიანებით, რაჭა-ლეჩხუმის, ქვემო სვანეთისა და გურიის ფედერაციების პრეზიდენტებს ხმის უფლება ჩამოერთვათ. გადაწყვეტილება, რომელიც სფფ-ის საარჩევნო ყრილობაზე იქნა მიღებული, 33 დელეგატიდან მხარი 17-მა დაუჭირა, ხოლო 15 წინააღმდეგი წავიდა.
ფედერაციის პრეზიდენტობისთვის სამი კანდიდატი იბრძოდა - რევაზ არველაძე, ლევან კობიაშვილი და მამუკა კვარაცხელია. ყრილობას საქართთველოს ფეხბურთის ფედერაციის პრეზიდენტობის კანდიდატების გარდა ესწრებოდნენ დელეგატები, ფედერაციის მაღალჩინოსნები, უეფა-ს ვიცე-პრეზიდენტი და უეფა-ს სხვა წარმომადგენლები.

აქამდე, საქართველოს ფეხბურთის ფედერაციის პოსტი ზვიად სიჭინავას ეკავა, რომელიც არჩევნებამდე ვადაზე ადრე გადადგა და მის მოვალეობას ვიცე-პრეზიდენტი ალექსანდრე ჩივაძე ასრულებდა.