ახალ ზელანდიასთან საქართველოს თამაშმა "6 ერის" გაფართოების საკითხი კვლავ გაააქტიურა

სპორტი - 13:33, 03 Oct, 2015

9502

ახალი ზელანდიის წინააღმდეგ გამართული მატჩის შემდეგ ის აქტუალური გახდა „6 ერის“ გაფართოების საკითხი და მასში საქართველოს გაწევრიანება. „ბორჯღალოსნების“ მწვრთნელმა მილტონ ჰეიგმა მოუწოდა „ 6 ერის“ წევრებს კარი საქართველოსთვის გააღონ.

"მე ამ მოწოდებას გავაკეთებ ყველგან სადაც ამის შესაძლებლობა მომეცემა“- განაცხადა ჰეიგმა.

მისი თქმით საქართველოს მორაგბეთა ნაკრების განვითარებისთვის გადამწყვეტი მნიშვნელობა აქვს, რომ ითამაშოს ძლიერ ნაკრებებთან. „ჩვენი ადგილი იმ გუნდებს შორისაა“- აღნიშნა მილტონ ჰეიგმა.

“როგორც კი ამ საკითხზე ლაპარაკის საშუალება მეძლევა ყოველთვის ვიძახი, რომ ეს ბიჭები იმსახურებენ "7 ერში" ყოფნას. ჩვენი განვითარებისთვის ასეთი კონკურენტუნარიანი გარემო სასიცოცხლოდ მნიშვნელოვანია. ვიცი, რომ ეს რთულად მისაღები გადაწყვეტილებაა ‘6 ერის’ მხრიდან, მაგრამ ვფიქრობ, რაგბი გლობალური უნდა გახდეს და აღმოსავლეთ ევროპის ბაზარიც საბოლოოდ უნდა გაიხსნას.”- განაცხადა მილტონ ჰეიგმა. ამ კითხვით ახალი ზელანდიის კაპიტანს რიჩი მაკ’ქოუსაც მიმართეს: “ეს ტურნირი ჩვენთვის აღარ არის ‘ადვილი’. რაგბის სტანდარტი საკმაოდ მაღლა ავიდა. ყველამ კარგად ვნახეთ, ე.წ. ’ტოპ’ ნაკრებების რთულად მოპოვებული გამარჯვებები და მეორე ეშელონის გუნდების ზეწოლა მათზე, გუშინდელი დაპირისპირება ერთ-ერთი მათგანი იყო.”