მთავრობა მომავალ წელს ეკონომიკის 3-პროცენტიან ზრდას ელოდება. 2016 წლის მთავარ ფინანსურ დოკუმენტს პარლამენტში დღეს ელოდებიან.

როგორც პარლამენტის უმრავლესობის დეპუტატები აცხადებენ, ბიუჯეტი დაახლოებით 10 მილიარდი ლარი იქნება და ის გათვლილია 3-პროცენტიან ეკონომიკურ ზრდაზე, 3-პროცენტიან საბიუჯეტო დეფიციტსა და დაახლოებით 4-4,5-პროცენტიან ინფლაციაზე.

რაც შეეხება იმას, თუ რა გაცვლით კურსზე დაიგეგმა მომავალი წლის ბიუჯეტი, ფინანსთა მინისტრის თქმით, გაცვლითი კურსი ბიუჯეტზე დიდ ზეგავლენას არ ახდენს.

ცნობილია ისიც, რომ გასული 3 წლის მსგავსად მთავრობის პრიორიტი 2016 წელსაც სოციალური პროგრამები იქნება.

"10 მილიარდამდე იქნება ბიუჯეტი. სოციალურ პროექტები შენარჩუნებულია. ინფრასტრუქტურული პროექტები მრავლად არის," - აცხადებს ზურაბ ტყამალაძე.

დეპუტატი ნოდარ ებანოიძე კი ამბობს, რომ მთავრობა ბიუჯეტს პარლამენტში დღეს გადმოაგზავნის გამომდინარე იქიდან, რომ ბიუჯეტის წარმოდგენის ვადა დღეს იწურება.