დღეს, 27 სექტემბერს, სოხუმის დაცემის დღესთან დაკავშირებით პარლამენტის თავმჯდომარემ, დავით უსუფაშვილმა, პარლამენტის ტერიტორიული მთლიანობის აღდგენის საკითხთა დროებითი კომისიის თავმჯდომარემ, გიორგი ვოლსკიმ და პარლამენტის წევრებმა გმირთმა მოედანზე, საქართველოს ტერიტორიული მთლიანობისთვის დაღუპულ გმირთა მემორიალი გვირგვინით შეამკეს.

„დღეს, კიდევ ერთხელ, ყველა მოქალაქე საქართველოში ვიხსენებთ იმ დღეს, როდესაც საქართველოს ისტორიაში, ჩვენს თანამედროვე ისტორიაში ერთ-ერთი ყველაზე ტრაგიკული ფურცელი დაიწერა. ვიხსენებთ იმ გმირებს, რომლებიც დაეცნენ ამ ბრძოლაში და ყველა ერთად ვდებთ პირობას, რომ გავაგრძლებთ ჩვენს შრომას, ჩვენს ბრძოლას ტერიტორიული მთლიანობის აღსადგენად, დაკარგული ხალხის შემოსაერთებლად და იმ გმირების ნაღვაწის დასასრულებლად. ეს მოხდება და დარწმუნებული ვარ ამას აღარ დასჭირდება სისხლი, ეს მოხდება მშვიდობიანი გზით თანამედროვე დემოკრატიულ სამყაროსთან ერთად და ეს აუცილებლად მოხდება. სამწუხაროა, რომ ჩვენ ამ დღეებში ვგლოვობთ ავღანეთში გმირულად დაცემულ ჯარისკაცს დაეს გარკვეულწილად დღევანდელ დღეს დამატებით დატვირთვას აძლევს, რა თქმა უნდა. ქვეყანას გმირები უნდა ახსოვდეს და უნდა ვეცადოთ, რომ გმირების სიცოცხლე არ იყოს საჭირო იმ თემების, იმ პრობლემების მოსაგვარებლად, რაც ქვეყნის წინაშეა“, -განაცხადა დავით უსუფაშვილმა.