ექსკლუზივი: "სილქნეტი მონებად გვამუშავებს"- კომპანიის თანამშრომლები გაფიცვით იმუქრებიან

საზოგადოება - 10:11, 26 Sep, 2015

5719

სატელეკომუნიკაციო კომპანია „სილქნეტის“ თანამშრომლები გაფიცვით იმუქრებიან. კომპანიის მენეჯმენტმა თანამშრომლებს ხელფასი 10 % - ით შეუმცირა.
„ძვირფასო კოლეგებო, გაცნობებთ, რომ კომპანიაში სტაბილური და ჯანსაღი მდგომარეობის შესანარჩუნებლად მიმდინარეობს ხარჯების ოპტიმიზაციის პროცესი, რომლის ერთ-ერთი მნიშვნელოვანი შემადგენელი ნაწილი სახელფასო ბიუჯეტია. ოპტიმიზაციის მისაღწევად, გადაწყდა ნაწილი თანამშრომლების შემცირების ნაცვლად, არსებული ტვირთი გუნდურად გავიზიაროთ და 1 ოქტომბრიდან თითოეული თანამშრომლის სახელფასო ფონდი შემცირდეს 10 %- ით. აღნიშნული ცვლილება განურჩევლად პოზიციისა, ყველა თანამშრომელზე თანაბრად აისახება“ - ამ შინაარსის წერილი დახვდათ დღეს სამსახურში მისულ თანამშრომლებს.
როგორც „ნიუპოსტს“ კომპანიის თანამშრომელმა აცნობა, სატელეკომუნიკაციო კომპანიის მენეჯმენტმა ხელფასი უკვე მეორედ შეამცირა.
ქალბატონი, რომელიც ვინაობის გამჟღავნებისგან თავს იკავებს, ამბობს, რომ მისი ინფორმაციით, ხელფასის შემცირება მხოლოდ „ქოლ ცენტრს“ შეეხო და არა მთელს კოლექტივს, როგორც ამას თანამშრომლებს სილქნეტის ხელმძღვანელობა უმტკიცებს.
„სილქნეტი, რომელმაც მომხმარებელს ტარიფები გაუზარდა 480 ლარზე მონებად გვამუშავებს. დღეს დილით კი სიურპრიზი მოგვიწყო და ანაზღაურება 10 %- ით შეგვიმცირა“ - განუცხადა „ნიუპოსტის“ წყარომ.
მისი თქმით, მენეჯმენტის გადაწყვეტილებას თანამშრომელთა გაფიცვა მოჰყვა, ამიტომ დილიდან შეუძლებელი იყო კომპანიის ცხელ ხაზთან დაკავშირება.
ჩვენი ინფორმაციით, თანამშრომლებმა ტოპ მენეჯერებს სამდღიანი ვადა მისცეს, მიღებული გადაწყვეტილების შესაცვლელად.
ბუნებრივია, „ნიუპოსტი“ "სილქნეტის" საზოგადოებასთან ურთიერთობის სამსახურს დაუკავშირდა. თეონა წერეთელმა ჩვენთან საუბრისას დაადასტურა ინფორმაცია კომპანიაში არსებულ უთანხმოებასთან დაკავშირებით, თუმცა იქვე დასძინა, რომ "სილქნეტი" ჩვეულ რეჟიმში აგრძელებს მუშაობას.
„განვმარტავთ, რომ კონკრეტული განყოფილების თანამშრომლებს ჰქონდათ გაურკვევლობა ანაზღაურების გეგმასთან დაკავშირებით, რაც ამ მომენტისთვის გარკვეულია და სამსახური აგრძელებს ჩვეულ რეჟიმში მუშაობას“- გვითხრეს „სილქნეტში“.
შეგახსენებთ, რომ „სილქნეტმა“ აბონენტებს მომსახურება 4 მარტიდან გაუძვირა. აბონენტთა ნაწილი 30 %- ზე მეტს იხდის.
მაშინ კომპანიაში აცხადებდნენ, რომ ფასების ცვლილება დაკავშირებული იყო როგორც ლარის კურსის ცვლილებასთან, ასევე ინტერნეტის სიჩქარის და ხარისხის გაზრდასთან.

დავით ჯაბაშვილი