გურიის ფეხბურთის ფედერაციის საქმიანობით შესაძლოა პროკურატურა დაინტერესდეს

საზოგადოება - 15:15, 23 Sep, 2015

1546

"საქართველოს სპორტის საზოგადოების" თავმჯდომარის მოვალეობის შემსრულებელის, გიორგი ცობეხიას განცხადებით, რეგიონულ ფედერაციებში დელეგატების არჩევა კანონდარღვევით ხდება.

ცობეხიამ "პრაიმტაიმის" პრესკლუბში დოკუმენტაციაც წარმოადგინა, რომლის თანახმადაც, გურიის ფედერაციის პრეზიდენტს, კახა ებრალიძეს არ ჰქონდა უფლება დამოუკიდებლად წარედგინა დელეგატის კანდიდატურა.

საჯარო რეესტრის ეროვნულ სააგენტოში დაცული დოკუმენტაციის მიხედვით, გურიის რეგიონალური ფედერაციის წესდების თანახმად, დელეგატის წარდგენაზე უფლებამოსილი პირი/ორგანო განსაზღვრული არ არის. როგორც საჯარო რეესტის დოკუმენტშია აღნიშნული, ფედერაციის წესდების მიხედვით, ფედერაციის გამგეობა წარმოადგენს ხელმძღვანელ და წარმომადგენლობით ორგანოს, რომლის წესდების 5.16-ე მუხლის მიხედვით, პრეზიდენტი „ასრულებს გამგეობისა და საერთო კრების მიერ მიღებულ გადაწყვეტილებას“ აღნიშნულის გათვალისწინებით, პრეზიდენტს არ გააჩნია უფლებამოსლება მიიღოს ერთპიროვნული გადაწყვეტილება ფედერაციის უმაღლესი ან/და ხელმძღვანელი და წარმოამდგენლობითი ორგანოს კომპეტენციას მიკუთნებულ საკითხზე.

ცობეხიას თქმით, გურიის ფედერაციის პრეზიდენტმა, კახა ებრალიძემ კანონდარღვევით მოახდინა ერთპიროვნული გადაწყვეტილების მიღება და აღმასკომის სხდომაზე ის კანდიდატი წარადგინა, რომელიც მისთვის იყო მისაღები.

ცობეხიას განმარტებით, ორგანიზაცია რამდენიმე დღეში პროკურატურას განცხადებით მიმართავს, რათა მოხდეს რეგიონული ფედერაციების საქმიანობისა და კონკრეტულად დელეგატების არჩევის საკითხის შესწავლა, გამოკვლევა და იმ პირების პასუხისგებაში მიცემა, ვინც აღნიშნულ სქემაში იღებს მონაწილეობას.

"ჩვენ სახეზე გვაქვს დეფექტური საარჩევნო გარემო, რომლის მთავარი მონაწილეები და მთავარი შემქმნელები დღევანდელი ფედერაციის მესვეურები არიან",- აღნიშნა გიორგი ცობეხიამ.

ორგანიზაციის წარმომადგენლებს აქვთ გონივრული ეჭვი, რომ რამდენიმე რეგიონალურ ფედერაციაში, მოხდა უფლებამოსილების არაჯეროვანი შესრულება და დოკუმენტაციების გაყალბება, რაც, საქართველოს სისხლის სამართლის კოდექსის დარღვევაა.