ოლიმპიური სკანდალი - ალექსი ახვლედიანი შესაძლოა პროკურატურაში დაიბარონ

საზოგადოება - 15:17, 23 Sep, 2015

5104

თბილისის ახალგაზრდული ოლიმპიური ფესტივალის საორგანიზაციო კომიტეტის თავმჯდომარე ელექსი ახვლედიანი შესაძლოა პროკურატურაში დაიბარონ.

როგორც ოლიმპიადის დახურვის ცერემონიალში მონაწილეები აცხადებენ, რეჟისორებისთვის, ტექნიკური პერსონალისთვის და პროდიუსერებისთვის გაწეული სამუშაოებისთვის თანხა ამ დრომდე არ გადაურიცხავთ.

ორ თვეზე მეტია გასამჯელოს ელის რეჟისორი ბასა ფოცხიშვილი. როგორც „ნიუპოსტს“ რეჟისორმა განუცხადა, ოლიმპიადის დახურვის ცერემინიალისთვის მას და მის გუნდს 180 000 ლარი უნდა მიეღო.

„მას შემდეგ რაც ჩვენს მიერ გაკეთდა განცხადებები არსებულ დავალიანებებზე მივიღეთ პირობა, რომ კუთვნილ ჰონორარს არაუგვიანეს 10 დღეში მივიღებდით“,- განუცხადა „ნიუპოსტს“ ფოცხიშვილმა.

რეჟისორი ამბობს, რომ მას მორალური პასუხისმგებლობა აქვს თანამშრომლების წინაშე.

„ყველანაირ გონივრულ ვადას გადასცდა ამ თანხის გადახდის ვადები. მორალური პასუხისმგებლობა მაქვს აღებული, იმ ადამიანებთან, რომლებმაც ღამეები ათენეს. დიდი იმედი მაქვს, რომ თანხას თბილისის ახალგაზრდული ოლიმპიური ფესტივალის საორგანიზაციო კომიტეტი უახლოეს პერიოდში გაისტუმრებს. ძალიან ვწუხვარ, რომ ასეთი რაღაც მოხდა. პირადად მე იურიდიულად არაფერ შუაში არ ვარ, მორალური მხარე მაწუხებს. ამ ადამიანებმა 40 გრადუსიან სიცხეში იმუშავეს და არაჩვეულებრივად შესარულეს თავისი მოვალეობა“,- განაცხადა ბასა ფიცხიშვილმა.

როგორც ფოცხიშვილმა ჩვენთან საუბარში აღნიშნა, კონტრაქტი, კულტურის პალატასთან გააფორმა. თავის მხრივ დავით ოქიტაშვილი ამბობს, რომ ელოდება ახალგაზრდული ოლიმპიური ფესტივალის საორგანიზაციო კომიტეტისგან კუთვნილი თანხის გადახდას.

ოქიტაშვილის განცხადებით, საორგანიზაციო კომიტეტი დახურვის ცერემიონიალისთვის გაწერილი 350 000 ლარის გადახდას ალექსი ახვლედიანი თვის ბოლოსთვის შეჰპირდა.

„გახსნის ცერემონიალისთვის განკუთვნილი 2 მლნ. 150 000 ლარი, თბილისის ახალგაზრდული ოლიმპიური ფესტივალის საორგანიზაციო კომიტეტმა გადაიხადა. რაც შეეხება დახურვის ცერემიონიალს კომიტეტს დავალიანების სახით აქვს 350 000 ლარი. ვესაუბრე პასუხისმგებელ პირებს და უახლოეს პერიოდში გადახდას შეფვპირდნენ, იმედია პირობას შეასრულებენ“,- უთხრა „ნიუპოსტს“ ოქიტაშვილმა.

„ნიუპოსტი“ახალგაზრდული ოლიმპიური ფესტივალის საორგანიზაციო კომიტეტის ხელმძღვანელთან დარეკვას დილიდან ცდილობს, თუმცა ალექსი ახვლედიანი ჩვენს ზარებს ამ დრომდე არ პაუხობს, შესაბამისად ჩვენ ვერ მივიღეთ პასუხი რა გახდა დავალიანების დაგროვების მიზეზი.

ცნობისთვის, ოლიმპიადის ბიუჯეტი რამდენჯერმე გაიზრადა. ოფიციალური ინფორმაციით, თბილისის მერიის ბიუჯეტიდან ფესტივალისთვის სამ მილიონზე მეტი ლარი გამოიყო.

მერიაში ამბობენ, რომ ახალგაზრდული ოლიმპიური კომიტეტის საორგანიზაციო კომიტეტის მიერ არსებულ დავალიანებებს სწავლობენ, რის შემდეგაც დავალიანების გასტუმრება დაიწყება.

"ნიუპოსტი" ახვლედიანის საგამოძიებო სისტემაში შესაძლო დაბარებაზე მომხდარზე ფინანსთა სამინისტროს დაუკავშირდა, როგორც უწყებაში გვითხრეს აღნიშნულ საქმეზე გამოძიება არ დაწყებულა.

გავრცელებული ინფორმაციით, ალექსი ახვლედიანის და ოლიმპიური კომიტეტის საქმიანობით, ქვეყნის პრემიერ-მინისტრი ირაკლი ღარიბაშვვილი დაინტერესდა.

დავით ჯაბაშვილი