"ამას სასწრაფოდ უნდა მიხედოს მთავრობამ და პარლამენტმა"- გოცირიძის გაფრთხილება ხელისუფლებას

ბიზნესი & ეკონომიკა - 13:39, 22 Sep, 2015

3161

ეკონომიკური განვითარების ცენტრის ხელმძღვანელი რომან გოცირიძე ხელისუფლებას მოსალოდნელი სირთულეების შესახებ აფრთხილებს, რომელიც ლარის გაუფასურების გამო გარდაუვალი იქნება:
"ლარის გაუფასურება მრავალ პრობლემასთან ერთად რამდენიმე სხვა დამატებით სირთულესაც წარმოშობს, რაც კიდევ უფრო გააღარიბებს მოსახლეობას. ამას სასწრაფოდ უნდა მიხედოს მთავრობამ და პარლამენტმა:
-საგადასახადო კანონმდებლობით, ვისი საოჯახო შემოსავალიც გადააჭარბებს წლიურად 40 ათას ლარს, უნდა გადაიხადოს ქონების გადასახადი. ეს ეხება ყველანაირ ქონებას: ბინას, მიწას, აგარაკს, კომერციულ ფართს, დაუმთავრებელ მშენებლობას და ასე შემდეგ.
თუ პირს დოლარში ჰქონდა შემოსავალი, ვთქვათ ბინას აქირავებდა, მას იგი ლარებში თითქმიდ 40 პროცენტით გაეზრდება და მოხვდება გადამხდელებში. საუბარია ოჯახზე, და არა მხოლოდ ერთ პირზე.
40 ათასიანი ზღვარი, რომელიც 10 წლის წინათ დაწესდა, შესაცვლელია.
-ასევე უნდა იქნას გადახედილი დამატებული ღირებულების გადასახადიდან განთავისუფლების ზედა ზღვარი, რომელიც 100 ათასი ლარია. უამრავი კერძო თუ იურიდიული პირი დაკარგავს ამ შეღავათს, ძირითადად- მცირე ბიზნესში დაკავებულები, რომლებსაც ისედაც გაუჭირდათ ძალიან."- წერს რომან გოცირიძე.