"მთავარია შევინარჩუნოთ სიმშვიდე, არ ავყვეთ ემოციას"

"მთავარია შევინარჩუნოთ სიმშვიდე, არ ავყვეთ ემოციას" - ღარიბაშვილი ლარის დევალვაციაზე

ბიზნესი & ეკონომიკა - 21:17, 21 Sep, 2015

2705

პრემიერ-მინისტრმა ირაკლი ღარიბაშვილმა მთავრობის ეკონომიკურ გუნდთან და ეროვნული ბანკის პრეზიდენტ გიორგი ქადაგიძესთან სამუშაო შეხვედრის დასრულების შემდეგ ლარის დევალვაციაზე და მთავრობის გეგმაზე ისაუბრა.
პრემიერის განცხადებით, როგორც ეროვნული ბანკის, ასევე ფინანსთა სამინისტროს პროგნოზებით, საშუალოვადიან პერსპექტივაში ლარის დასტაბილურება უნდა დაიწყოს.
"მინდა, საზოგადოებას ვუთხრა, რომ ბოლო რამდენიმე კვირაა უშუალოდ მე ვხელმძღვანელობ ამ საკოორდინაციო შეხვედრების ჩატარებას. დღეს მორიგი შეხვედრა გავმართეთ. მოვისმინე როგორც ეროვნული ბანკის, ასევე ფინანსთა სამინისტროს პოზიციები, მათი ხედვები ლართან მიმართებაში. ორივეს პოზიცია არის ერთი და იგივე მაკროეკონომიკურ პარამეტრებთან დაკავშირებით. ისინი თანხმდებიან, რომ ლარის კურსი არის დღეს უკვე ასე ვთქვათ, პიკში. როგორც ეროვნული ბანკის, ასევე ფინანსთა სამინისტროს პროგნოზებით, ლარის დასტაბილურება უნდა დაიწყოს საშუალოვადიან პერსპექტივაში", - განაცხადა ღარიბაშვილმა.
მისი თქმით, როგორც ეროვნული ბანკი ასევე ფინანსთა სამინისტრო მათ ხელთ არსებულ ყველა ინსტრუმენტსა და ბერკეტს გამოიყენებეენ სიტუაცის მაქსიმალური გააკონტროლებისთვის.
"მთავარია ახლა ჩვენ შევინარჩუნოთ სიმშვიდე, აღარ ავყვეთ აჟიოტაჟს და ემოციებს. დანარჩენ პროცესს ჩვენ ეროვნულ ბანკთან ერთად ვმართავთ და უახლოეს პერიოდში მოსალოდნელია სიტუაციის დარეგულირება და დასტაბილურება", - განაცხადა ღარიბაშვილმა.
საქართველოს ეროვნულმა ბანკმა 22 სექტემბრისთვის ლარის ოფიციალური გაცვლითი კურსი დაადგინა. რომლის თანახმად, 1 აშშ დოლარის ოფიციალური ფასი 22 სექტემბერს 2.4499 ლარი იქნება. აქამდე მოქმედი ოფიციალური გაცვლითი კურსით, 1 აშშ დოლარი 2.4491 ლარს შეადგენდა, შესაბამისად, ეროვნული ვალუტა დოლართან მიმართებაში 0.0008-ით გაუფასურდა.

სებ-ის კურსით, 1 ევროს შეძენა 2.7632 ლარად იქნება შესაძლებელი. აქამდე მოქმედი კურსი კი 2.8001 ლარს შეადგენდა, ეროვნული ვალუტა ევროსთან მიმართებაში 0.0369- ით გამყარდა.