" ბოლომდე ვაპირებ ბრძოლას" - გამოცხადდება თუ არა მაესტრო გაკოტრებულად

საზოგადოება - 21:08, 21 Sep, 2015

3596

ტელეკომპანია "მაესტროს" ხელმძღვანელობამ სასამართლოს ტელეკომპანიის გაკოტრებულად და გადახდისუუნაროდ გამოცხადების შესახებ მიმართა.
აღნიშნულ ინფორმაციას "მაესტროს" ერთ-ერთი მეწილე გიორგი გაჩეჩილაძე ადასტურებს.
მისი თქმით, კომპანიაში პარტნიორთა კრება ჩატარდა, სადაც ერთ-ერთმა მეწილემ მაკა ასათიანმა მისგან აღებული კრედიტების დაუყოვნებლივ დაფარვა მოითხოვა, რის შემდეგაც პარტნიორებმა გადაწყვიტეს, რომ გაკოტრების შესახებ საქმე დაიწყოს.
"უცნობი" დარწმუნებულია, რომ კომპანიის მიზანმიმართული გაკოტრება მიმდინარეობს, იმისათვის, რომ ის მოგვიანებით აუქციონზე გაიყიდოს და უცხოელი მფლობელების ხელში აღმოჩნდეს.

"როგორც თქვენ გაიგეთ, მეც დღეს გავიგე, რომ შეიტანეს სასამართლოში განცხადება გაკოტრებაზე. ბოლომდე ვაპირებ ბრძოლას, რომ ეს არ მოხდეს. "მაესტროს" გაკოტრება არ შეიძლება, იმიტომ, რომ ამ ტელევიზიაში სისხლი და ხორცი მაქვს ჩანთხეული. ვერაფრით დავუშვებ, რომ უცხოების ხელში აღმოჩნდეს ტელევიზია", - განაცხადა გაჩეჩილაძემ.

შეგახსენებთ რომ "მაესტროს" საკონტროლო პაკეტს, დიზაინერ მაკა ასათიანის ქმარი, რუსეთში მცხოვრები კოტე გოგელია ფლობს.

"ნიუპოსტი"არხის გენერალურ დირექტორ ბაია გადაბაძესთან დაკავშირებას ცდილობს თუმცა ის ჩვენს სატელეფონო ზარებს არ პასუხობს.