მას შემდეგ რაც "ჯაჯანიძის შოუ" სკანდალში გაეხვა, გადაცემის წამყვანმა პირველი კომენტარი გააკეთა და საჯარო ბოდიშიც მოიხადა.

"ასე ნამდვილად არ ყოფილა. ჩვენ ხევსურეთში დიდი პატივისცემით ჩავედით მხოლოდ იმ მიზნით, რომ მთელ საქართველოს და მსოფლიოს ენახა ხევსურეთი. მოკრძალებით ჩავედით. ახალგაზრდებმა თუ მუსიკა ჩართეს და იცეკვეს, არა მგონია, ეს დანაშაული იყოს. არ ვიცოდი, რომ ცეკვა აღვირახსნილობა იყო",- განუცხადა "ფორტუნას" შოუს წამყვანმა.

ჟურნალისტის კითხვაზე: "გია, იქნებ, თამო ვაშალომიძის თამამმა დეკოლტემ გააღიზიანა ხევსურები?", ტელეწამყვანი პასუხობს, რომ ის ვარშალომიძის კოსტიუმების მხატვარი არ არის.

"მე არ ვარ თამუნა ვაშალომიძის კოსტიუმების მხატვარი, რაც უნდოდა, ის ჩაიცვა. არაფერი ისეთი მის ჩაცმულობაში არ ყოფილა. ამ გამოხმაურებით გაოცებული დავრჩი. ტრადიციული ხმალაობა ვაჩვენეთ, გადავიღეთ შატილობა, პირიქით გვინდოდა გამოგვსვლოდა, მთის მიმართ დიდი მოწიწებით ვარ განწყობილი.

ჩემი მხრიდან თუკი ვინმეს ვაწყენინე, ბოდიშს ვიხდი, მაგრამ კიდევ ერთხელ ხაზგასმით მინდა აღვნიშნო, რომ ხევსურეთში ჩავედით უნიკალური ნაგებობების საჩვენებლად, პირველ რიგში, ტურისტებისთვის. გვინდოდა, ენახათ, რა სიმდიდრე გვაქვს",- აცხადებს ჯაჯანიძე.

შეგახსენებთ, რომ ხრიდოლის ეროვნული ფედერაციის პრეზიდენტმა, ნუკრი მჭედლიშვილმა საკუთარი „ფეისბუქის“ გვერდზე ვრცელი სტატუსი გამოაქვეყნა, სადაც გია ჯაჯანიძე და მისი გადაცემის სტუმრები ხევსურული სიწმინდეების შელახვაში დაადანაშაულა და „სხვა რაკურსს“ უმსგავსობაში დასდო ბრალი.

" მიუხედავად იმისა, რომ მთას უკვე აღარ უკვირს ბარიდან მოსული სტუმრების მიერ სალოცავების წაბილწვა, წლევანდელ შატილობას ტელეკომპანია „იმედის“ გადაცემა „სხვა რაკურსმა“ და გია ჯაჯანიძემ ყოველგვარ ზღვარს გადააბიჯეს...“,- წერს მჭედლიშვილი.

წყარო: რადიო - "ფორტუნა".