ნაგავსაყრელზე ნაპოვნ ჩვილს ქეთევანი დაარქვეს

საზოგადოება - 19:02, 21 Sep, 2015

2838

ვარკეთილში, 18 სექტემბერს ნაგავსაყრელთან ნაპოვნ ჩვილს ქეთევანს დაარქვეს.

დიდუბე-ჩუღურეთის რაიონის სოციალური მომსახურების ცენტრის უფროსი, სოციალური მუშაკი ნატო ჩაფიძე ამბობს, რომ ექიმების ძალისხმევით ჩვილის სიცოცხლეს საფრთხე არ ემუქრება.

მისი თქმით, ყველა გამოკვლევის დასრულების შემდეგ კი მას მიმღებ ოჯახში გადაიყვანენ.

“ჩვილი მიმღებ ოჯახში დარჩება მანამ, სანამ არ გაირკვევა სამართლებრივი სტატუსი. სავარაუდოდ, პატარა იმ დღეს დაბადებული იყო, როცა იპოვეს, ჩვენ გვყავს გადაუდებელი მიმღები ოჯახები, რომლებიც დარეგისტრირებულნი არიან. უკვე ვიცით, სად გადავიყვანთ პატარას… ვცდილობთ, ეკლესიური სახელი შევურჩიოთ. როგორც შევიტყვეთ, ჩვილის საავადმყოფოში შეყვანის დღეს მისი მკურნალი ექიმის დაბადების დღე ყოფილა და გადავწყვიტეთ მისი სახელი – ქეთევანი დავარქვათ, გვარსაც შევურჩევთ“,- აცხადებს ნატო ჩაფიძე.

ვარკეთილის დასახლებაში, ერთ-ერთი კორპუსის ეზოში ჩვილი ოთხი დღის წინ იპოვეს. სასწრაფო სამედიცინო დახმარების ბრიგადამ ის იაშვილის სახელობის კლინიკაში გადაიყვანა.

ექიმების განცხადებით, ახალშობილი გოგონა 2 კილოგრამსა და 860 გრამს იწონის.

მომხდარზე გამოძიება სისხლის სამართლის კოდექსის 127-ე მუხლით მიმდინარეობს, რაც სიცოცხლისათვის საშიშ მდგომარეობაში ჩაყენებას გულისხმობს. ჯერჯერობით, უცნობია მშობლების ვინაობა.

საქმეში ჩაერთო ჯანდაცვის სამინისტროს სოციალური მომსახურების ცენტრიც.