კულტურული მემკვიდრეობის სააგენტო ინგოროყვას 18-ში მდებარე სახლის სარემოონტო სამუშაოების შესახებ განცხადებას ავრცელებს. აღნიშნული სახლის ფოტოები ფეისბუკში აქტიურად ვრცელდებოდა, საზოგადოება დედაქალაქის მთავრობას სახლის ფასადის დამახინჯებაში ადანაშაულებდა.

ქალაქ თბილისში ინგოროყვას 18-ში მდებარე კულტურული მემკვიდრეობის ძეგლის პირველადი გადაუდებელი სამუშაოები დასრულებულია. გამაგრებულია ძეგლის ავარიული საძირკველი, რომლის პრევენციული კონსერვაციის მიზნით, შესაბამისი ნებართვა კულტურული მემკვიდრეობის დაცვის ეროვნული სააგენტოს მიერ არის გაცემული.

"ინგოროყვას 18-ში მდებარე საცხოვრებელი სახლის კედელი 2015 წლის თებერვალში ჩამოინგრა, რომელმაც შენობის მდგრადობას, შესაბამისად, სახლის მაცხოვრებლებს და შენობის დეკორაციულ ელემენტებს საფრთხე შეუქმნა. შექმნილ ფორსმაჟორულ სიტუაციაში ორ ეტაპიანი სარეაბილიტაციო პროექტი მომზადდა და ძეგლის კრიტიკული მდგომარეობიდან გამომდინარე, დაიგეგმა საძირკველის გადაუდებელი კონსერვაცია, კედლების გამაგრება. ფასადების 3D სკანირება და შედეგად დეკორის მოხსნა, ნაგებობის არქიტექტურულ-მხატვრული ღირებულებების შენარჩუნების მიზნით, ფასადის იმ ნაწილში, სადაც აღნიშნული მეთოდოლოგიური პროცესის განხორციელება აუცილებლობას წარმოადგენდა.
პროექტით განსაზღვრული სარეაბილიტაციო სამუშაოების მეორე ეტაპი 2016 წელს არის დაგეგმილი და გათვალისწინებულია შენობის პირვანდელი სახით აღდგენა, მათ შორის კედლის დეკორაციული ელემენტების ადგილზე დაბრუნება."- აღნიშნულია განცხადებაში