„დელტა“ ლაგოდეხის რაიონის სოფელ კაბალში მომხდარ ინციდენტთან დაკავშირებით განცხადებას ავრცელებს.

მათი განმარტებით, ინციდენტის მიზეზი ერთ-ერთი ჭურვის მწყობრიდან გამოსვლა გახდა.

„სსსტც „დელტას“ სეტყვის საწინააღმდეგო სისტემის მართვის ცენტრის მიერ 16 სექტემბრის 19:00 სთ-დან კახეთის რეგიონში სიღნაღისა და ლაგოდეხის რაიონების საზღვარზე დაფიქსირდა განვითარების პროცესში მყოფი შიდამასიური სეტყვის ღრუბელი, ხოლო 21:00-დან 00:00-მდე ღრუბელმა განვითარება დაიწყო გურჯაანის, ყვარლის, თელავის, საგარეჯოსა და დედოფლისწყაროს რაიონების თავზე.

მთელი ამ პერიოდის განმავლობაში სეტყვის ალბათობა 80%-ს აღემატებოდა. მოსალოდნელი სეტყვის მარცვლების ზომა 15-დან 30 მმ- მდე მერყეობდა, ხოლო ღრუბლის მასების საერთო ფართობმა 1500 კმ2-ს მიაღწია.

სტიქიის თავიდან აცილების მიზნით სეტყვის საწინააღმდეგო სისტემის მართვის ცენტრმა დღემდე უპრეცენდენტო სამუშაოები გაატარა და ზემოთაღნიშნულ რაიონებში 15-ჯერ განახორციელა ღრუბლების სარაკეტო დამუშავება. გასროლილ იქნა 160 ერთულამდე რაკეტა.

ზემოქმედების შედეგად ღრუბლების სრული მასა ადგილზე ჩამოიცალა წვიმისა და უწვრილესი, უვნებელი ყინულის კრისტალების სახით.

სეტყვასაშიში ღრუბლების აქტიური დამუშავების პროცესში ერთ-ერთი ჭურვი, ტექნიკური ხარვეზის გამო, მწყობრიდან გამოვიდა, რის შედეგადაც ლაგოდეხის რაიონის სოფელ კაბალში ერთ-ერთი ადგილობრივი მოსახლის სახლს დაეცა.

სსსტც “დელტა” აღნიშნული რაკეტების შესყიდვას მაკედონიიდან ახორციელებს და შესაბამისად მსგავსი ხარვეზი "დელტასგან" დამოუკიდებელი მიზეზით არის გამოწვეული. აღნიშნულ საკითხზე მიმდინარეობს შესწავლა, რათა სამომავლოდ მსგავსი შემთხვევები თავიდან იქნას აცილებული. ხოლო რაც შეეხება მიყენებულ ზარალს, ის სრულად იქნება ანაზღაურებული“, - ნათქვამია განცხადებაში.