ლანჩხუთის რაიონის სოფელ ჭანჭათის მცხოვრებლები მგლების მასიურ შემოსევას უჩივიან. მათი განცხადებით, ბოლო შემთხვევა სამის დღის უკან დაფიქსირდა, როდესაც ნადირმა ერთ-ერთი მაცხოვრებლის პირუტყვი დაგლიჯა.

,,აღარაფერს ვამბობთ წვრილფეხა საქონელზე, რომელსაც დღითიდღე გვინაგდურებს. აღარ დაგვიტოვა თხები და საქონელი. ეს ყველაფერი დღისით-მზისით, ჩვენს თვალწინ, საკარმიდამო ფართობებში ხდება. სამწუხაროდ, ჩვენ უძლურნი ვართ. გარდა ამისა, დაღამდება თუ არა გარეთ ვერ გამოხვალ. აქვე ყურის ძირში არიან. ვითხოვთ, რომ ვინმე მოგვაქციოს ყურადღება და რაიმე ღონისძიებები გატარდეს, შეიქმნას მონადირეთა ჯგუფი. წინააღმდეგ შემთხვევაში ჩვენ დავრჩებით ლუკმა-პურის გარეშე“, - ამბობენ ადგილობრივები.