"მე და საზოგადოების" სწავლება არ გადადებულა და 2016-2017 სასწავლო წლიდან იგეგმება

საზოგადოება - 12:35, 14 Sep, 2015

1555

საქართველოს განათლების სამინისტროს განცხადებით, გავრცელებული ინფორმაცია იმის შესახებ, რომ სკოლაში ახალი სასკოლო საგნის „მე და საზოგადოება“ შეტანა გადაიდო, სიმართლეს არ შეესაბამება. უწყების განცხადებით დამოუკიდებელი საგნის სწავლება სახელწოდებით „მე და საზოგადოება“ 2016-2017 სასწავლო წლიდან იგეგმება. საგნის შესახებ მსჯელობა მიმდინარეობს, სტანდარტზე მუშაობა დასრულებული არ არის და ჯერჯერობით არც სახელმძღვანელოები დაბეჭდილა.

როგორც აგვისტოს თვეში სამინისტროში ახალი სასწავლო საგნის პრეზენტაციისას გახდა ცნობილი. III-IV კლასის საგნობრივ სტანდარტებში დიდი ყურადღება დაეთმობა მოსწავლის სამოქალაქო აღზრდის კომპონენტს, რაც ძალიან მნიშვნელოვანია მისი სრულყოფილი განვითრებისათვის. ახალ საგანში ძირითადი აქცენტები კეთდება მოსწავლის გარემომცველ სამყაროზე (ოჯახი, სკოლა, თემი), ჯანსაღი ცხოვრების წესზე, უსაფრთხოებაზე, ძალადობის საკითხებზე, ტოლერანტობაზე, სოციალური უნარების განვითარებაზე, სახელმწიფოზე და გარემოს დაცვაზე.

აღნიშნული საგნის სკოლაში შეტანას „დემოგრაფიული განვითარების ფონდის“ პრეზიდენტი, რაინდის წოდების მქონე ლევან ვასაძე ეწინააღმდეგება. ვასაძის შეფასებით ეს საგანი მოზარდი თაობის ფსიქიკის შეუქცევად დეფორმაციას გამოიწვევს. აღნიშნული განცხადება ვასაძემ საზოგადოება „თბილისელის“ შეკრებაზე გააკეთა:

„ოჯახის სიმტკიცის, ეროვნული და ზნეობრივი ფასეულობების და ღირებულებების დაცვის ნაცვლად სტანდარტი ბავშვს ადრეული ასაკიდანვე ასწავლის მრავალფეროვნებას, გენდერულ თანასწორობას, ყველა ფორმის განსხვავებლობის მიმღებლობას, ოჯახური კონფლიქტების გასაჯაროებას და მიზნის მისაღწევად როლური თამაშების მეთოდი შემოაქვს. საგანი წარმოადგენს ახალი აზროვნების ნიმუშს, რომელიც მთელ მსოფლიოში მრავალფეროვნებისა და ტოლერანტობის ნიღბის ქვეშ უპირისპირდება კულტურულ, ეთნიკურ თუ რელიგიურ თავისებურებებს. ოჯახის სიმტკიცის, მშობლების სიყვარულისა და პატივისცემის ნაცვლად აქცენტი გადატანილია ოჯახში ძალადობაზე, კონფლიქტზე, ბავშვის მიერ თავისი უფლებების დაცვასა და სხვადასხვა ფორმით მათ რეალიზებაზე. ნიშანდობლივია, რომ ზემოაღნიშნული საგანმანათლებლო-სოციალური ექსპერიმენტი განათლების სამინისტროში მას შემდეგ იქნა ინიცირებული, რაც პარლამენტმა მიიო საქართველოს კანონი“დისკრიმინაციის ყველა ფორმის აღმოფხვრის შესახებ“. როდესაც ვსაუბრობთ ბავშვის მიერ განსხვავებულობის მიმღებლობაზე და ყველანაირი უმცირესობის დისკრიმინაციის მანკიერებაზე, მოსწავლეს ლგბტ პირთა ქცევის ნორმად აღიარებისკენაც მოვუწოდებთ და ერთგვარ პატივისცემას ვუნერგავთ.

საგანი „მე და საზოგადოება“ მენტალურად განსხვავებულია, სრულიად არის აცდენილი ქართულ რეალობას და მისი დანერგვა ბუნებრივად გამოიწვევს მოზარდი თაობის ფსიქიკის შეუქცევად დეფორმაციას. იმედს ვიტოვებთ, რომ ფართო საზოგადოება, რომლისთვისაც განათლების და მეცნიერების სამინისტრომ საჯაროობის პრინციპის დარღვევით არ უზრუნველყო სტანდარტის ფართო და დეტალური გაცნობა, სათანადოდ შეაფასებს აღნიშნულ საგანგაშო ვიტარებას და არ დაუშვებს იმ პროცესის დაწყებას, რაც გამოიწვევს მომავალი თაობის ცნობიერებაში ეროვნული ფასეულობების, ღირებულებების, პრინციპების და რწმენის სრულ რღვევას“-განაცხადა ვასაძემ

ვასაძის თქმით ამ საგნის შემოტანით მართლდება ჯორჯ სოროსის სიტყვები „თქვენთან კი არა, თქვენს შვილიშვილებთან ვაპირებთ თანამშრომლობას“-ო, როგორც ვასაძე აცხადებს რომ საგნის დანერგვის წინააღმდეგია საპატრიარქოც, მაგრამ „ქარავანი მიდის…“