მედიასკანდალები - რა ფაქტებზე საუბრობს "ქრონიკა+" ?!

საზოგადოება - 13:35, 08 Sep, 2015

10044

გამოცემა „ქრონიკა+“-ის ინფორმაციით „იმედის“ თოქ შოუ „იმედის კვირა“ არ დახურულა. „კულუარებში უკვე სახელდება ინგა გრიგოლიას შემცვლელი, რომელიც, არაოფიციალური ინფორმაციით, მის მიერვე გადაცემის პროდიუსერად მიყვანილი გიორგი ნიორაძე იქნება, ხოლო პოლიტიკურ თოქ შოუს 8 საათიანი „ქრონიკის“ წამყვანი, თეა სიჭინავა მოამზადებს, რომელიც ბიძინა ივანიშვილს ძალიან უყვარს. „იმედის“ კულუარებში ამბობენ, რომ სწორედ ამის გამო თეა სიჭინავას ხელფასი 25 ათასი ლარია. „საზოგადოებრივ მაუწყებლიდან“ „იმედში“ გადმოინაცვლებს „პირველი არხის„ წამყვანი, თამთა სანიკიძე, რომელიც რამდენიმე ხნის წინათ ბიძინა ივანიშვილის დისშვილის, შმაგი კობახიძის მეუღლე გახდა და „მეცხრე არხის“ დახურვის შემდეგ „საზოგადოებრივ მაუწყებელზე“ რვასაათიანი „მოამბე“ მიჰყავდა. სხვათა შორის, სწორედ თამთა სანიკიძის დასასაქმებლად მოხსნეს ეთერიდან 8 საათიანი „მოამბის“ წამყვანი თამარ ურუშაძე.

თამთა სანიკიძე „იმედში“ გადასვლას არ აპირებდა, რომ არა რამდენიმე ხნის წინათ მომხდარი ინციდენტი „საზოგადოებრივ მაუწყებელზე“ . „ქრონიკა+“-ის წყაროს ინფორმაციით, „მეორე არხის“ პროგრამების დირექტორი დოდო შონავა გენერალურ დირექტორს, გიორგი ბარათაშვილს, კაბინეტში შევარდნია: თუ ჩემს შვილს ვასილ ივანოვ ჩიქოვანს უმუშევარს დატოვებ, იცოდე, შენს თავს დავაჭერინებო! დირექტორის კაბინეტიდან კარგა ხნის განმავლობაში გამოდიოდა აურზაური და წივილ-კივილი. ამ ხმაურიანი შეხვედრის შემდეგ ვასილ ივანოვ-ჩიქოვანისთვის 8-იანი „მოამბის“ წაყვანა შეუთავაზებიათ, რაზეც თამთა სანიკიძეს ერთი ამბავი აუტეხავს,- მაგ გაბურძგნილ ბიჭთან ერთად საინფორმაციოს წამყვანი არ ვიქნებიო და „იმედზე“ გადასვლა გადაუწყვეტია. გენერალურ დირექტორს დოდო შონავას მუქარების ისე შეშინებია, ვასილ ივანოვ- ჩიქოვანისთვის „პირველ არხზე“ ანალიტიკური თოქ შოუს მომზადება დაუვალებია“- წერს გამოცემა.

„ქრონიკა+“ კომენტარისთვის დოდო შონავას დაუკავშირდა. შონავამ გიორგი ბარათაშვილთან მომხდარი დაპირისპირება კატეგორიულად უარყო.

„აბსოლუტური ცილისწამებაა. ე.ი შევედი გიორგი ბარათაშვილთან და ვუთხარი, შენ ჩემს შვილს უმუშევრად თუ დატოვებ , დაგაჭერინებ. ჯერ ერთი დაგაჭერინებ რა სიტყვაა? ეს ჟურნალისტის საკადრისი სიტყვაა? როგორ ფიქრობთ ახლა? მე როგორ შემიძლია გენერალურ დირექტორთან ასე ფეხით შევაღო კარი და ასეთი რაღაც? მე სუბორდინაციას ვიცავ, გაიგეთ? და მეორე ჩემს შვილს არასოდეს დასჭირვებია მხარდაჭერა სადმე მოსაწყობად. ყველგან კონკურსით მივიდა. თქვენი წყაროს ფსიქიკური მდგომარეობა არის შესამოწმებელი, იმიტომ რომ ძალიან ბევრ უხერხულობაში გაგხვევთ“- განუცხადა დოდო შონავამ „ქრონიკა+“