კურორტ ბახმაროს ელექტროენერგიის მიწოდება შეუწყდა

საზოგადოება - 22:15, 04 Sep, 2015

2407

დღეს დილიდან კურორტ ბახმაროს დამსვენებლებს შუქის მიწოდება შეუწყდათ. ენერგო პრო ჯორჯიამ დავალიანების გამო, ელექტროენერგია მომავალ სეზონამდე გამორთო. ამ წუთებში ელექტროენერგია კურორტზე არსებულ ერთადერთ სასტუმროს მიეწოდება. როგორც ჩოხატაურის გამგებელი, ირაკლი კუჭავა "გურიის მოამბესთან" საუბარში აცხადებს, ორი კვირის წინ დავალიანების გამო გამორთული ელექტროენერგია, დამსვენებლების პროტესტისა და ენერგო-პრო ჯორჯიასთან წარმოებული მოლაპარაკებების გამო, დამსვენებლებს მალევე ჩაერთოთ, თუმცა ამჯერად ისინი ვერაფრის შეცვლას ვერ შეძლებენ: "ორი კვირის განმავლობაში კბილებით შევინარჩუნეთ შუქი ბახმაროში, თუმცა ვერ მოხერხდა დავალიანების დაფარვა და ენერგო პრო ჯორჯიამ დამოუკიდებლად მიიღო ეს გადაწყვეტილება". შეგახსენებთ, რომ კურორტის დამსვენებლებს ელექტროენერგიის მიწოდება რამდენიმე დღის წინაც შეუწყდა, თუმცა დამსვენებლების მიერ გამოხატული პროტესტის შემდეგ, მათთვის შუქის მიწოდება საღამოს საათებში მოხერხდა. ამჟჯერად კი, როგორც ჩვენთან საუბარში ჩოხატაურის გამგებელი აცხადებს, შუქის ჩართვა ვერ მოხერხდება და კურორტზე დღემდე მყოფ დამსვენებლებს მოუწევთ არსებულ სიტუაციასთან შეგუება.