"საარჩევნო ხმა ყველა კლუბს უნდა ჰქონდეს" - ფედერაციაში განცხადებები შევიდა

სპორტი - 16:59, 03 Sep, 2015

1833

სფფ-მ საარჩევნო მანდატით მხოლოდ 13 ქართული კლუბი აღჭურვა, რასაც დანარჩენების პროტესტი მოჰყვა. ფედერაციის არაწევრმა და, შესაბამისად, უხმო კლუბებმა სფფ-ში განცხადებები შეიტანეს.

„აჭარიდან ფედერაციის წევრობის მოთხოვნა შეიტანა ოთხმა კლუბმა - ბათუმის „დინამომ“, ქობულეთის „შუქურამ“, ქედის „ბეთლემმა“ და ხელვაჩაურის „მაჭახელამ“. იმედი გვაქვს, რომ ბათუმის „დინამო“, როგორც საქართველოს ვიცე-ჩემპიონი, ფედერაციის წევრობასა და საარჩევნო ხმის უფლებას მიიღებს. ჩემი ინფორმაციით, ფედერაციის აღმასკომის სხდომა 7 სექტემბერს გაიმართება და, იმედი გვაქვს, მიზანს მივაღწევთ“ - განაცხადა ბათუმის „დინამოს“ პრეზიდენტმა ოთარ ფედიჩკინმა.

„ვფიქრობ, ფედერაციის წევრობისთვის არ აქვს გადამწყვეტი მნიშვნელობა, გუნდი უმაღლეს ლიგაში თამაშობს თუ პირველში. პირველი ლიგაც, სადაც „ბორჯომი“ ასპარეზობს, საქართველოს ჩემპიონატია და ვფიქრობთ, წევრობა და ხმის უფლება ჩვენც გვეკუთვნის. დაველოდებით პასუხს ფედერაციიდან და ვიმედოვნებთ, საარჩევნო პროცესში მონაწილეობის უფლება მოგვეცემა“ - ამბობს „ბორჯომის“ დირექტორი რომან კურტანიძე.

ჯერჯერობით უცნობია, დაკმაყოფილდება თუ არა კლუბების მოთხოვნა.