თბილისის ზოოპარკი 13 სექტემბერს გაიხსნება

საზოგადოება - 11:41, 03 Sep, 2015

1846

თბილისის ზოოპარკის დირექტორის განცხადებით თბილისის ზოოპარკი 13 სექტემბერს გაიხსნება. ამასთან დაკავშირებით ზურაბ გურიელიძემ პორტალ „კვირას“ პრესკლუბში ისაუბრა.

გურიელიძის თქმით, ზოოპარკში არსებული სამი იარუსიდან ყველაზე დაბალი ნაწილი სრულიად განადგურებულია და მის აღდგენას აზრი არ აქვს:

„აღსადგენი იყო ისეთი ინფრასტრუქტურული ნაწილი, რომელიც თვალით არ ჩანს. აღსადგენი იყო კანალიზაცია, გაზი დღემდე არ არის აღდგენილი, თუმცა ეს დამთვალიერებელს ხელს არ შეუშლის. საკმაოდ ბევრი ვოლიერი აღდგა, აღდგა პინგვინების ვოლიერიც, თუმცა დღეს მხოლოდ 4 პინგვინი დაგვრჩა. დაწყებულია ბეჰემოთის დროებითი ვოლიერის მშენებლობა. ზოოპარკი შეიძლება განვიხილოთ როგორც, 3-იარუსიანი პირველი, ყველაზე დაბალი იარუსი მთლიანად განაგდურებულია და მის აღდგენას აზრი არა აქვს. მის თავიდან აშენებას ჯობია, ის აშენდეს იქ, სადაც ამისთვის უკეთესი პირობები არსებობს“,- განაცხადა ზურაბ გურიელიძემ.

ზურაბ გურიელიძემ ახალი ზოოპარკის მშენებლობაზეც ისაუბრა და აღნიშნა რომ მერიამ ზოოპარკის შემოღობისთვის 2 მილიონი ლარი უკვე გამოყო, თუმცა უშუალოდ მშენებლობის პროცესი ჯერჯერობით არ დაწყებულა და არც საბოლოო პროექტი არის დამტკიცებული. ზოოპარკის მშენებლობის თანხების მოსაზიდად საერთაშორისო დონორებთან და საქართველოს მთავრობასთან აქტიური მუშაობა მიმდინარეობს.

ზოოპარკის დირექტორის ვარაუდით ახალი ზოოპარკის აშენებისთვის დაახლოებით 50-60 მილიონი დოლარი ან ევრო იქნება საჭირო.

„ამჯერად გენერალური გეგმის შედგენაზე ვმუშაობთ, შემდეგ დაიწყება ვოლიერების დაგეგმარება და დაპროექტება. მნიშვნელოვანია ის, რომ მერიას განსაზღვრული აქვს, შემოღობოს ეს ტერიტორია და ამისთვის 2 მილიონი ლარი გამოყო. რაც შეეხება ვადებს, ახალი ზოოპარკის მშენებლობას მინიმუმ 3 წელი დასჭირდება“, – აღნიშნა გურიელიძემ.