როგორც დაანონსებული იყო, ლევან კობიაშვილის კანდიდატურა ფეხბურთის ფედერაციაში ყველაზე ტიტულოვანმა ქართულმა კლუბმა „დინამო თბილისმა“ წარდგინა.

3 ოქტომბერს გასამართ არჩევნებში გამარჯვების შანსი ორ კანდიდატს აქვს - ლევან კობიაშვილს და რევაზ არველაძეს.

სფფ-ის შენობიდან გამოსვლის შემდეგ კობიაშვილმა და ფიფიამ მედიასთან კომენტარები გააკეთეს.

„საპრეზიდენტო კანდიდატად „დინამო თბილისმა“ წარმადგინა, რაც ჩემთვის დიდი პატივია. არჩევნებამდე დარჩენილ პერიოდს მაქსიმალურად ნაყოფიერად გამოვიყენებ, შევხვდები კლუბებს, რეგიონულ ფედერაციებს, ფედერაციის ყველა სუბიექტს. არჩევნები უნდა ჩატარდეს დემოკრატიულ გარემოში, სახელმწიფოს ყოველგვარი ჩარევის გარეშე, დარწმუნებული ვარ, ასეც იქნება. ოპტიმისტურად ვარ განწყობილი და მჯერა, რომ ყველაფერი კარგად დასრულდება“, - განაცხადა ლევან კობიაშვილმა.

თბილისის „დინამოს“ პრეზიდენტი კი არჩევნებში ლევან კობიაშვილის გამარჯვებაში დარწმუნებულია.

„მომავალს იმედით ვუყურებ, დარწმუნებული ვარ, რომ გავიმარჯვებთ. ქართულ ფეხბურთში ცვლილებების დროა და მიზანს აუცილებლად მივაღწევთ, სახელმწიფოს ჩარევის გარეშე“, - განაცხადა რომან ფიფიამ.