როგორი იქნება ბორჯღალოსნების კვართი 2015 წლის მსოფლიო ჩემპიონატზე (ფოტო)

სპორტი - 18:23, 31 Aug, 2015

5846

ბორჯღალოსნების სატურნირო ფორმის პრეზენტაცია 2015 წლის მსოფლიო თასის დაწყებამდე 18 დღით ადრე მოხდა. ამის შესახებ ინფორმაციას საქართველოს რაგბის კავშირის ფეისბუკგვერდი ავრცლებს.“ საქართველოს ნაკრები წლევანდელ ტურნირზე იასპარეზებს შავი და წითელი კვართებით, რომლებიც ბორჯღალოსანთა ეკიპირების მწარმოებლის ანდერ არმორის „არმორ გრიდ“- ArmourGrid ტექნოლოგიითაა დამზადებული.

კვართზე გამოსახულია ბორჯღალი, მსოფლიო თასის ლოგო და მწარმოებლის ნიშანი, ხოლო ძველი ქართული მხედრული ლეგენდის თანახმად, ზურგზე ამოქარგულია ვაზი. ზემოაღნიშნული ტექნოლოგიით დამზადებული მაისური საკმაოდ მჩატეა და მეტოქისთვის მასზე ჩაჭიდება რთულია. გარდა ამისა კვართზე დამატებულია სარაგბო სამყაროში უკვე ფართოდ გავრცელებული ფუნქციონალური, ჟელესებრი პანელები, რომლებიც ბურთის შეჭიდებას უწყობს ხელს.

სათამაშო ფორმის საპრეზენტაციო ფოტოსესიაში ბორჯღალოსნებმა, მამუკა გორგოძემ, ლაშა ხმალაძემ, დავით კაჭარავამ და ლაშა ლომიძემ ინგლისში გამგზავრებამდე მიიღეს მონაწილეობა. აქვე გვინდა დიდი მადლობა გადავუხადოთ Kikala Studio-ს, მამუკა კიკალიშვილს და სტრატეგიული ბრენდინგის სააგენტო LIVE Branding-ს ფოტო-სესიის ორგანიზებისთვის და მხარდაჭერისთვის.

ქომაგებს გვინდა შევატყობინოთ, რომ მსოფლიო თასზე ტონგასთან (19 სექტემბერი) და არგენტინასთან (25 სექტემბერი) ჩენი ნაკრები შავი კვართებით ითამაშებს, ხოლო ახალ ზელანდიას (2 ოქტომბერი) და ნამიბიას (7 ოქტომბერი) ბორჯღალოსნები წითელი კვარტებით დაუპირისპირდებიან. ქომაგებს (ინგლისში წამსვლელებს და საქართველოში დამრჩენებს) გთხოვთ, რომ გაითვალისწინოთ და მათაშის დღეს შესაბამისი ფერის საქომაგო ატრიბუტიკით შეიმოსოთ.“- ნათქვამია რაგბის კავშირის მიმართვაში.