განათლების სამინისტროსთან აბიტურიენტების აქცია მიმდინარეობს. აბიტურიენტები მეორადი ჩარიცხვების სისტემის აღდგენას მოითხოვენ. სამინისტროსთან ის აბიტურიენტი არიან შეკრებილები, რომლებმაც ეროვნული გამოცდები ჩააბარეს, თუმცა სასურველ ფაკულტეტებზე ვერ მოხვდნენ.

აბიტურიენტები განათლების სამინისტროს უყურადღებობაში ადანაშაულებენ. როგორც მათ „ნიუპოსტთან“ საუბრისას განაცხადეს, მე-12 კლასში ყოფნისას მათთან არავინ მისულა და არც არავის განუმართავს თუ როგორ უნდა შემოეხაზათ და რა პრინციპით აერჩიათ უმაღლესი სასწავლებლები, რომ მინიმალური ზღვარის გადალახვის შემთხვევაში ისინი უნივერსიტეტებში მოხვედრილიყვნენ.

აქციაზე რამდენიმე ინციდენტი მოხდა. ადგილზე შეკრებილებმა სამინისტროს კარის ჩაკეტვა სცადეს, თუმცა მათ ამის უფლება საპატრულო პოლიციის წარმომადგენლებმა არ მისცეს. აქციაზე ერთ-ერთი აბიტურიენტი შეუძლოდ გახდა, რის გამოც ადგილზე საპატრულო პოლიცია იქნა გამოძახებული.

აბიტურიენტების ერთი ნაწილი ამ წუთებში გამოცდების ეროვნული ცენტრის ხელმძღვანელთან მაია მიმინოშვილთან შეხვედრას მართავს. შეუერთდებიან თუ არა ისინი აქციას, შეხვედრის დასრულების შემდეგ გახდება ცნობილი.

უნივერსიტეტის გარეთ დარჩენილი აბიტურიენტების მოთხოვნას, მეორადი ჩარიცხვების დანიშვნასთან დაკავშირებით, გამოცდებისა და შეფასების ეროვნული ცენტრის ხელმძღვანელი მაია მიმინოშვილი გამოეხმაურა. მაია მიმინოშვილი მეორადი ჩარიცხვების დანიშვნის წინააღმეგია, მისი თქმით აბიტურიენტებს საკმაო დრო და საშუალება ჰქონდათ, რომ უნივერსიტეტები ყურადღებით შეერჩიათ. მიმინოშვილი აბიტურიენტების მიერ დაგეგმილ აქციასაც გამოეხმაურა და აღნიშნა, რომ აქციის ჩატარების უფლება ყველას აქვს.