ხატი „ყოველთა მწუხარეთა სიხარული“ თბილისში ილორის წმიდა გიორგის სახელობის ტაძარში დაივანებს

საზოგადოება - 10:19, 28 Aug, 2015

2140

მოგზაურობა დაასრულა აფხაზეთის მთავრობის მიერ შეწირულმა ხატმა „ყოველთა მწუხარეთა სიხარული“, რომელიც უწმინდესისა და უნეტარესის, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტ ილია II-ის ლოცვა-კურთხევით დაიწერა ქართველთა და აფხაზთა შორის დაკარგული ძმობის, ერთობის, მშვიდობის, თანხმობის, ერთსულოვნების აღდგენისა და ძმათამკვლელ ომში დაღუპულთა სულების საოხად.

ხატი, პატრიარქის ლოცვა-კურთხევით, დაახლოებით ერთი წელია, მოგზაურობს საქართველოს სამოციქულო ავტოკეფალური ეკლესიის ეპარქიებში, განსაკუთრებით იმ რეგიონებში, სადაც დიდი რაოდენობით არიან აფხაზეთიდან დევნილები.

ნიშანდობლივია, რომ ეს მოგზაურობა ხატმა 2014 წლის 27 სექტემბერს, ჯვართამაღლების დღესასწაულზე, სოხუმის დაცემის დღეს დაიწყო.

ეს დღე იმითაც იყო მნიშვნელოვანი, რომ გმირთა მოედანზე, აფხაზეთში დაღუპულ მეომართა სულების მოსახსენებელი პანაშვიდის გადახდის შემდეგ, უწმინდესმა და უნეტარესმა ილია II-მ აფხაზეთის ხელისუფლებას იერუსალიმიდან ჩამობრძანებული სადაფის ქვისგან თლილი ჯვარი გადასცა ყოველგვარ ბოროტებაზე გამარჯვების ნიშნად.

ბოროტებაზე გამარჯვებას, მტრის მზაკვრობათა განქარვებას, წილხვედრი ერის გამთლიანებას, ქართველთა და აფხაზთა გულებში ჭეშმარიტი სინანულისა და ურთიერთმიტევების დანერგვას შესთხოვდა დედა ღვთისას ამ ერთი წლის მანძილზე სრულიად საქართველოს ეკლესიის მრევლი და, განსაკუთრებით დევნილი მოსახლეობა ქუთაის-გაენათის, ზუგდიდისა და ცაიშის, ფოთისა და ხობის, ბათუმისა და ქობულეთის, ურბნისისა და რუისის, ბორჯომისა და ბაკურიანის, სამთავისისა და გორის, ალავერდის, ჭყონდიდის ეპარქიების სხვადასხვა ტაძრებში.

დღეს, 27 აგვისტოს, ღვთისმშობლის მიძინების წინადღესასწაულზე, ქართველთა და აფხაზთა მშვიდობისა და ერთობისათვის დაწერილი ხატი „ყოველთა მწუხარეთა სიხარული“ თბილისში მშენებარე ილორის წმიდა გიორგის სახელობის ტაძარში დაივანებს (ელიავას ბაზრობის მიმდებარე ტერიტორია).