თოიძის სამხატვრო სასწავლებლის შენობა იყიდება

ბიზნესი & ეკონომიკა - 13:28, 21 Aug, 2015

2521

ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულმა სააგენტომ თბილისში, ჭონქაძის ქუჩა 21-ში მდებარე უძრავი ქონება, თოიძის სახელობის სამხატვრო სასწავლებლის შენობა აუქციონზე გასაყიდად გამოიტანა. ამის შესახებ დღეს გამართულ პრესკონფერენციაზე სახელმწიფო ქონების ეროვნული სააგენტოს გაყიდვების სამსახურის უფროსმა, სოფიო ჭელიძემ იასუბრა.

მისი თქმით, ელექტრონული აუქციონი თბილისში ჭონქაძის ქუჩა 21-ში სახელმწიფო საკუთრებაში არსებულ 3841 კვ.მ. არასასოფლო სამეურნეო დანიშნულების მიწის ნაკვეთის და მასზე განთავსებულ 4 549,03 კვ.მ. შენობა-ნაგებობების პრივატიზების მიზნით 20 აგვისტოს გამოცხადდა და 18 სექტემბერს 17:00 საათზე დასრულდება.

ქონების საწყისი საპრივატიზებო ღირებულება 8 200 000 ლარს შეადგენს. მისი თქმით, აღნიშნული ქონება განთავსებულია თბილისის ერთ-ერთი უძველეს, ისტორიულ და ტურისტულად დატვირთულ ნაწილში. ობიექტიდან 600 მეტრის მანძილზე მდებარეობს თავისუფლების მოედანი, ხოლო 700 მეტრის დაშორებით განთავსებულია საქართველოს პარლამენტი. ობიექტის მახლობლად არსებული სამთო-საბაგირო რკინიგზა თვეში საშუალოდ 20 000-მდე ტურისტის მთაწმინდის პარკში ტრანსპორტირებას უზრუნველყოფს, რაც ობიექტის მიმდებარე ტერიტორიას ტურისტურად აქტიურს ხდის. საპრივატიზებო ებიექტი მდებარეობს საცხოვრებელ ზონა 5-ში, დანაშენიანების კოეფიციენტებია K1-0,5; K2-2,1; K3-0,1.

ჭელიძის თქმით, ქალაქის ცენტრალურ ისტორიულ ნაწილში მდებარე არასასოფლო სამეურნეო დანიშნულების მიწის ნაკვეთი ხელსაყრელია როგორც დეველოპერული მიზნებისთვის, ასევე სასტუმრო კომპლექსის ინფრასტრუქტურის მოსაწყობად. სახელმწიფო ქონების შემძენი შეიძლება იყოს საქართველოს, ან უცხო ქვეყნის მოქალაქე, ან კერძო სამართლის იურიდიული პირი, ან ამ პირთა გაერთიანება, რომლის ქონებაშიც საქართველოს სახელმწიფოს, ან ადგილობრივი თვითმმართველობის ორგანოს მონაწილეობის წილი 25%-ზე ნაკლებია.