ანაკლია და Gem fest „სი-ენ-ენ“-ის თვალით

კულტურა - 13:01, 21 Aug, 2015

1774

ანაკლიაში გამართული პირველი ქართული ელექტრონული მუსიკის ფესტივალი „სი-ენ-ენ“-ის ყურადღების ცენტრშიც აღმოჩნდა. ამერიკული ტელეარხი 31 ივლისს Gem fest-ის გახსნას სტუმრობდა, როდესაც სცენა ცნობილმა ჰოლანდიელმა დიჯეიმ, არმინ ვან ბიურენმა დაიკავა.
„სი-ენ-ენ“-ი აღნიშნავს, რომ ორგანიზატორებმა, რომლებმაც საქართველოში ასეთი მასშტაბის ელექტრონული მუსიკის ფესტივალი პირველად ჩაატარეს, ანაკლია, გარდა მისი სანაპიროსი, სხვა მიზნითაც შეარჩიეს - ეს ზღვისპირა ქალაქი ესაზღვრება აფხაზეთს, რომელმაც საქართველოსგან დამოუკიდებლობა გამოაცხადა და რუსეთთან საკუთარი კონტაქტები გაამყარა. ელექტრონული მუსიკის ფესტივალის დამფუძნებლები კი მიიჩნევენ, რომ ამგვარი მუსიკალური პროექტები ხელს უწყობს ხიდის აშენებას დაკარგული ტერიტორიისკენ,
Gem fest-ზე მოხვედრა აფხაზებს უფასოდ შეეძლოთ. სიუჟეტის თანახმად, ქართველებს ამგვარი მუსიკალური ფესტივალის მოსაწყობად სერბები დაეხმარნენ, რომლებიც საკუთარ ქვეყანაში ძალიან პოპულარულ ფესტივალს, „Exit“-ს ამზადებენ. მისი ერთ-ერთი წარმომადგენელი, მლადენ ჰრვანოვიჩი, რომელიც Gem fest-ზეც მუშაობდა, ამერიკულ ტელეარხთან საუბრისას გამოყოფს ამგვარი ღონისძიებების მნიშვნელოვან ასპექტებს და ამბობს, რომ მთავრობამ გააცნობიერა ამ პროექტის ღირებულება პირველ რიგში, ტურიზმის განვითარების კუთხით, დაინიშნა სპეციალური რეისები, ლონდონიდან და ბევრი სხვა ევროპული ქალაქიდან ანაკლიაში. „ეს არის ადგილი, სადაც აღმოსავლეთი დასავლეთს ხვდება“, აღნიშნავს Gem fest-ის სერბი წარმომადგენელი.