რადიო ,,აფხაზეთის ხმას“ მაუწყებლობა შეუჩერეს

საზოგადოება - 21:03, 19 Aug, 2015

1448

12 ათას ლარიანი დავალიანების გამო აფხაზეთის ხმას დილიდან რადიო მაუწყებლობა შეუჩერეს. კომპანიაში ამბობენ, რომ სეზონთან დაკავშირებული ფინანსური პრობლემების გამო, მათ გადახდის ვადის გახანგრძლივება მოითხოვეს. აფხაზეთის ხმის წარმომადგენლები გადაწყვეტილებას ხელისუფლების მხრიდან მიზანმიმართულ ზეწოლად აფასებენ. მათი მტკიცებით, მიუხედავად იმისა, რომ დავალიანება სხვა კომპანიებსაც ჰქონდათ, მუშაობის უფლება მხოლოდ აფხაზეთის ხმას შუეჩერდა. რადიო კომპანია მაუწყებლობის აღდგენას და თანხის ეტაპობრივად გადახდის უფლებას ითხოვს.

"დღეს, 19 აგვისტოს, საქართველოს ხელისუფლებამ კიდევ ერთი ნაბიჯი გადადგა დემოკრატიული ღირებულებების ნგრევის მიმართულებით - ანძიდან რადიო "აფხაზეთის ხმის" მაუწყებლობა შეწყვიტა. ბოლო რამდენიმე საათია, რადიო ვერ მაუწყებლობს, შექმნილ ვითარებაში ზარალდება კომპანია და პრობლემა ექმნებათ მასში დასაქმებულ ადამიანებს. ამის გამო ჩვენ - გამგეობის წევრები იძულებული გავხდით, საქართველოს ხელისუფლებისთვის განცხადებით მიგვემართა. ბოლო რამდენიმე წელია, რადიო "აფხაზეთის ხმა" ბაზარზე წარმატებით მაუწყებლობს. კარგად მოგეხსენებათ, თუ რა პირობებში გვიწევს მაუწყებლებს მუშაობა არასტაბილური სარეკლამო ბაზრის გამო. ქვეყანაში არსებული ეკონომიკური პრობლემების გამო ბოლო დროს შემცირებულია სარეკლამო შემოსავლები, შესაბამისად, ორგანიზაციასაც შეექმნა ფინანსური პრობლემები. ჩვენის მხრიდან ანძის მიმართ არსებული დავალიანება შესაძლებლობების ფარგლებში, კონკრეტული ვადაგადანაწილებით შევასრულეთ, დარჩენილია მთლიანი თანხის მხოლოდ 30 %, რომელსაც გრაფიკის მიხედვით ვფარავთ. თუმცა დღეს დილით მომსწრენი გავხდით "სიურპრიზის" - მცირედი დავალიანების გამო ანძამ შეწყვიტა რადიო "აფხაზეთის ხმის" მაუწყებლობა. მომხდარი პირდაპირ დარტყმას აყენებს თავისუფალი აზრის და სიტყვის გამოხატვას! მივიჩნევთ, რომ ჩვენზე ხორციელდება მიზანმიმართული ზეწოლა. მოგიწოდებთ, დაუყოვნებლივ აღადგინოთ მაუწყებლობა და მოგვცეთ ვადა ანძის მიმართ დავალიანების დასაფარად! იმედი გვაქვს, ყურად იღებთ ჩვენს პრობლემას და მიიღებთ შესაბამის ზომებს",- ნათქვამია განცხადებაში.