"გაძვირება გარდაუვალია"- რას აცხადებენ მეპურეები და გაძვირდება თუ არა პურთან ერთად სხვა პროდუქტებიც

ბიზნესი & ეკონომიკა - 15:55, 18 Aug, 2015

1742

პურის მწარმოებელი კომპანიების ხელმძღვანელების განცხადებით არსებული სიტუაციის გათვალისწინებით პურზე ფასის მატება გარდაუვალია. ამის მიზეზად მწარმოებლები ფქვილზე გაზრდილ ფასს და სამომავლოდ ელექტროენერგიის გაძვირებას ასახელებენ.

შპს „იბერია 2012“ის ხელმძღვანელის გივი გორგიაშვილის განცხადებით პროდუქციის წარმოების ფასმა მოიმატა, პურის ფასი კი იგივე რჩება, რის გამოც ის ზარალზე მუშაობს და საწარმო დახურვის საფრთხის წინაშეა:

„საგრძნობლად მოიმატა ფქვილის ფასმა, 7 ლარით არის ერთი ტომარის ფასი გაზრდილი, ამან გამიძვირა პროდუქცია, თუ მსხვილი კომპანიების მიერ არ მოხდა პურზე ფასის მატება, მე ვერ ვზრდი. ამიტომ ზარალზე ვმუშაობ და სანახევროდ გაჩერებული ვარ და შეიძლება საერთოდ გავჩერდე.“

შპს „პური ჩვენი არსობისა“-ს ხელმძღვანელის ომარ ფურცელაძის თქმით არსებული ვითარება პურის გაძვირებას გარდაუვალს ხდის.

„თუ ფქვილის არ გაიაფდა და ელექტროენერგიის ფასის მატება მოხდა, პურზე ფასის მატება გარდაუვალია. რამდენით და როგორ უცნობია, მაგრამ გარდაუვალია“

იფქლის დირექტორის შაქრო ბაკურაძის თქმით პურის ფასთან დაკავშირებით კომენტარს სოფლის მეურნეობის მინისტრთან შეხვედრის შემდეგ გააკეთებს.

შეგახსენებთ, კომპანია "იფქლის" ხელმძღვანელის შაქრო ბაკურაძის განცხადებით, ფქვილზე ფასი ხელოვნურად გაიზარდა და სფეროში უკანონობა ხდება. დღევანდელი მდგომარეობით, საქართველოში ხორბალი პრაქტიკულად ერთ კომპანიას შემოაქვს და ალტერნატიული ფქვილის შემოტანა იკრძალება, ბაკურაძის თქმით, თუ ბაზარი არ გახსნეს და ფქვილის შემოტანის ალტერნატიული წყაროები არ გაჩნდა, პურის ფასი მინიმუმ 10 თეთრით აუცილებლად გაიზრდება.

ექსპერტების შეფასებით ქვეყნის მთავარ პროდუქტზე ფასის მატებასთან ერთად ფასები შესაძლოა სხვა პროდუქტებზეც გაიზარდოს. ამის მთავარ მიზეზად კი ლარის გაუფასურებასა და კომუნალური გადასახადების მატებას ასახელებენ. ამავდროულად ანალიტიკოსების აზრით ხელისუფლების მხრიდან ბიზნესის მონოპოლიზების მცდელობასაც შეინიშნება.

"ისეთი სიტუაციაა, რომ თითქოს ვიღაც სპეციალურად ცდილობს, ამ ბიზნესში ვიღაც დაბლოკოს და მთავრობასთან შეთანხმებით მონოპოლიური პოზიცია დაამყაროს," - განაცხადა გიგა ბედინეიშვილმა კურიერთან საუბრისას.

შექმნილი ვითარებიდან ერთადერთ გამოსავლად ექსპერტები ეკონომიკის მიმართულებით პოლიტიკის შეცვლას მიიჩნევენ.