უნიკალური არქეოლოგიური აღმოჩენა ხიხანის ციხეში

უნიკალური არქეოლოგიური აღმოჩენა ხიხანის ციხეში - ფოტო

კულტურა - 15:02, 15 Aug, 2015

4303

მაღალმთიან აჭარაში, ზღვის დონიდან 2 635 მეტრის სიმაღლეზე, ხიხანის ციხეში მეცნიერებმა უნიკალური მარანი აღმოჩინეს, რომელშიც 43 ქართული ქვევრია მოთავსებული.

როგორც არქეოლოგები ვარაუდობენ, მარანი მე-12 მე-13 საუკუნეებით თარიღდება და ის წყლის შესანახად გამოიყენებოდა. არქეოლოგები ხიხანის ციხეში უკვე მესამე წელია მუშაობენ, მათ შარშან 28 ქვევრიანი ღვინის მარანი აღმოაჩინეს.

ექსპედიციის დასრულების შემდეგ ღვინის მარანის მსგავსად წყლის მარანის კონსერვაციაც მოხდება.

,,გამოვლინდა მარანი, რომელშიც 43 ქართული ქვევრია დაფიქსირებული. სავარაუდოდ, ეს მარანი არ უნდა იყოს როგორც მარანი მისი კლასიკური გაგებით და ეს უნდა იყოს წყლის რეზერვუარი და ის თარიღდება მე-12-მე-13 საუკუნეებით“ - განაცხადა ხიხანის ექსპედიციის ხელმძღვანელმა დავით მინდორაშვილმა.

როგორც აჭარის კულტურული მემკვიდრეობის დაცვის სააგენტოს ხელმძღვანელმა მირანდა ჩარკვიანმა განაცხადა, ეს ძეგლი არ არის მხოლოდ რეგიონალური მნიშვნელობის, არამედ ის არის ეროვნული და საერთაშორისო მნიშვნელობის ძეგლიც.

,,ჩვენი მაღალი მოტივაცია არის რომ მოხდეს ამ მძეგლის მთლიანად რეაბილიტაცია, ეს არის აჭარის ოლიმპო. სააგენტო დაინტერესებულია, რომ პერმანენტულად გაგრძელდეს სარეაბილიტაციო სამუშაოები. უნიკალური კომპლექსია, რომლის მთლიანად კონსერვაცია და ნაწილობრივ რეაბილიტაცია იგეგმება. არის ეკლესიის ფრაგმენტები, არის კოშკები, თანმიმდევრულად სააგენტო უზრუნველყოფს, რომ ხიხანზე რეაბილიტაციის საერთაშორისო სტანდარტები იყოს დაცული", - აღნიშნა მირანდა ჩარკვიანმა.