მასწავლებელთა პროფესიული განვითარების ეროვნული ცენტრის დირექტორმა, გიორგი მაჩაბელმა ქალაქ ზუგდიდში ის ტერიტორია მოინახულა, სადაც სამომავლოდ სამეგრელო-ზემო სვანეთის რეგიონის მასშტაბით მასწავლებლის სახლი აშენდება.

მასწავლებლის სახლი აღნიშნული რეგიონის მასწავლებელთა პროფესიული განვითარების მიმართულებით იფუნქციონირებს და ორგანიზებას გაუწევს გრძელვადიან და მოკლევადიან ტრენინგებს, სემინარებს, კონფერენციებსა და სხვა ღონისძიებებს.

გიორგი მაჩაბელმა ტერიტორია ზუგდიდის საკრებულოს თავმჯდომარესთან, მერაბ ქვარაიასთან ერთად დაათვალიერა. საკრებულოს ხელმძღვანელმა პროექტისადმი სრული მხარდაჭერა გამოხატა.

მასწავლებელთა სახლების ამოქმედება ზუგდიდის გარდა, ოზურგეთში, ახალციხესა და თელავშიც იგეგმება. მასწავლებელთა პროფესიული განვითარების ეროვნულ ცენტრში უკვე დამტკიცებულიაკონცეპტუალური მოდელი, რომლის მიხედვით რეგიონებში მასწავლებელთა სახლები შეიქმნება.

ინფრასტრუქტურული პროექტების განხორციელება მასწავლებელთა პროფესიული განვითარების ეროვნული ცენტრის ერთ-ერთი პრიორიტეტული მიმართულებაა, რათა მასწავლებლებს საკუთარ რეგიონში შეექმნათ პროფესიული განვითარების ყველა წინაპირობა.