ფოთში რამდენიმე დღის წინ ზღვაში 22 წლის ნიკა დარჯანია დაიხრჩო. შემთხვევა იმ დღეს მოხდა, როდესაც მაშველებმა დამსვენებლები გააფრთხილეს, რომ ძლიერი ტალღების გამო ზღვაში არ შესულიყვნენ.

როგორც ცნობილია, ნიკა წყალში მამა-შვილის დასახმარებლად შევიდა, მათი გადარჩენა შეძლო, თუმცა მან ზღვიდან გამოსვლა ვეღარ მოახერხა.

„თავიდან ზღვაში ბავშვი შევიდა, რომელიც გამოსვლას ვერ ახერხებდა. მის საშველად მამა შევიდა წყალში, თუმცა ვერც ის ახერხებდა გამოსვლას. ნიკამ ორივეს გამოყვანა შეძლო, თუმცა მას სავარაუდოდ გული გაუსკდა და გარდაიცვალა. მამა საშინელ მდგომარეობაშია. განიცდის, რომ მათ გამო ახალგაზრდა გარდაიცვალა“, - განუცხადეს „ნიუპოსტს“ გადარჩენილის ახლობლებმა.