საკრებულოში მირზა შაფის პროექტის კორექტირებული ვარიანტის დამტკიცებაზე მსჯელობენ

საზოგადოება - 17:50, 12 Aug, 2015

1588

თბილისის საკრებულოში ამ წუთებში მირზა შაფის ქუჩის რეაბილიტაციის კორექტირებული პროექტის დამტკიცების თაობაზე მსჯელობენ.

საკრებულოს ურბანული დაგეგმარებისა და საქალაქო მეურნეობის კომისიის თავმჯდომარის, გოჩა ბაბუნაშვილის თქმით, პროექტის კორექტირება რამდენიმე მიმართულებით იგეგმება.

ბაბუნაშვილის თქმით, არასამთავრობო ორგანიზაციების მოთხოვნის მიზეზი, რომ პროექტი დღეს არ დამტკიცდეს და ჩატარდეს ახალი კონკურსი მისთვის გაუგებარია.

"კორექტირება მოხდა კემპინსკის შეთანხმებით, რომელიც განახორციელებს ამ პროექტს. მოცულობა შემცირდა 5000 კვ.მ-ით, მოიხსნა სართულიანობა, დაემატა გამწვანების დეტალები და ჩაჯდა ლანდშაფტში. უკეთესი პროექტი მე ვერ ვნახე.

კონკურსი 4 თვის წინ გამოცხადდა, რომელშიც კემპინსკის პროექტმა გაიმარჯვა. შემდეგ ამ პროექტში მოხდა კორექტირება, რომლის განხილვაც სწორედ დღეს შედგება. ყველა პროცედურები დაცულია და ვერ ვხედავ მიზეზს მისი გადადების. იმედი მაქვს, საღი აზრი გაიმარჯვებს და დეპუტატები მიიღებენ გადაწყვეტილებას და კემპინსკის მიეცემა საშუალება, რომ 60 მილიონი აშშ დოლარი ჩადოს საქართველოს ეკონომიკაში", - განაცხადა გოჩა ბაბუნაშვილმა.