ლარის კურსზე გავლენას საზოგადოებაში დაგროვილი უარყოფითი მოლოდინები ახდენს- ქადაგიძე

ბიზნესი & ეკონომიკა - 16:07, 12 Aug, 2015

2797

საქართველოს ეროვნული ბანკის პრეზიდენტმა გიორგი ქადაგიძემ დრეს გამართგულ ბრიფინგზე ეროვნული ვალუტის კურსის შესახებ ისაუბრა და აღნიშნა, რომ ყველაზე მნიშვნელოვანი ფაქტორი, რაც ლარის კურსის გაუფასურებაზე გავლენას ახდენს, საზოგადოებაში არსებული უარყოფითი მოლოდინებია.

ქადაგიძის თქმით მილიარდდოლარიანი სავალუტო შემოდინებების დანაკლისი მოხმარებისა და იმპორტის შემცირებაში აისახა, შესაბამისად არსებული შოკი ლარის კურსის მიღებულ გაუფასურებაშია ასახული

სებ-ის პრეზიდენტის თქმით, მიმდინარე წლის ივლისში იმპორტი ერთჯერადი ფაქტორების გამოკლებით დაახლოებით 21%-ით შემცირდა, რაც იმას ნიშნავს, რომ სხვა თანაბარ პირობებში კურსზე განსაკუთრებული მერყეობა არ არის მოსალოდნელი.

„სხვა თანაბარ პირობებში ჩვენ განსაკუთრებულ მერყეობას კურსზე არ ველოდებით.
ბოლო კვირების მერყეობის ძირითადი მიზეზები რამდენიმეა. ივლისი, ჩვენი ინფორმაციით, გზავნილების თვალსაზრისით საკმაოდ სუსტი იყო, ამაზე კი ინფორმაცია რამდენიმე დღეში გამოქვეყნდება“, - განაცხადა გიორგი ქადაგიძემ.

მისივე თქმით, ის ფაქტი, რომ ბაზრის მონაწილეებს შემოდგომაზე კურსის გაუფასურებასთან დაკავშირებით გაზრდილი მოლოდინი აქვთ, ლარის კურსის გაუფასურებაზე გავლენას ახდენს.

„ყველაზე მნიშვნელოვანი, რაც დღეს კურსზე გავლენას ახდენს, ეს არის უარყოფითი მოლოდინები, რომლებიც საზოგადოებაშია. კონკრეტულად კი ის ფაქტი, რომ ბაზრის მონაწილეებს აქვთ ძალიან გაზრდილი მოლოდინი შემოდგომაზე კურსის გაუფასურებასთან დაკავშირებით“, - განმარტა ეროვნული ბანკის პრეზიდენტმა.

მისივე თქმით, კომპანიებისა და სხვა აქტორების მიერ დოლარის მარაგების დაგროვება ხდება, რაც კურსზე დამატებით ზეწოლას იწვევს.

„სხვა თანაბარ პირობებში, ეს მეორე მხრივ, ნიშნავს იმას, რომ შემოდგომაზე კურსზე ზეწოლა უნდა იყოს ნაკლები, ვინაიდან კომპანიები უცხოური ვალუტის ნაშთების დაგროვებას უკვე იწყებენ“, - აღნიშნა გიორგი ქადაგიძემ.