ტელეკომპანია "რუსთავი 2" სასამართლოსგან იმ მასალების დაჩქარებული წესით მიღებას ითხოვს, რის საფუძველზეც ტელეკომპანიის ქონება დააყადაღდა.

სასამართლოს ტელეკომპანიის იურისტმა თამთა მურადაშვილმა აღნიშნული მოთხოვნით ოფიციალურად მიმართა.

მისი თქმით, განჩინებაში არ ჩანს თუ რის საფუძველზეც მოხდა განჩინების გამოტანა.

„ეს ყველაფერი უნდა ყოფილიყო გამყარებული სერიოზული მტკიცებულებებით, საფუძვლებით, შესაბამისი სამართლებრივი ნორმების მითითებით, რომელმაც მოსამართლეს შეუქმნა დასაბუთებული ვარაუდი, რომ ნამდვილად უნდა მიეღო ასეთი გადაწყვეტილება და დაეყადაღებინა რუსთავი 2-ის მთლიანი ქონება ასეთი მკაცრი განაჩენით. შესაბამისად, ჩვენ გვაინტერესებს ეს მასალები, რამ შეუქმნა საფუძვლიანი ვარაუდი მოსამართლეს, რომ მიიღო ასეთი მკაცრი და სასტიკი გადაწყვეტილება“, - განაცხადა თამთა მურადაშვილმა.