9 აგვისტოს სამების საკათედრო ტაძრიში სრულიად საქართველოს კათოლიკოს-პატრიარქმა ილია მეორემ პროექტის ,,წიგნი ყველა სოფელს'' მონაწილეები დალოცა.

წიგნებით სავსე მოძრავი ბიბლიოთეკა ამჯერად გეზს რაჭა-ლეჩხუმის სოფლებისკენ აიღებს და სასკოლო ბიბლიოთეკებს მხატვრული ლიტერატურით მოამარაგებს.

„წიგნი ყველა სოფელს" - სპორტისა და ახალგაზრდობის საქმეთა სამინისტროს სსიპ ბავშვთა და ახალგაზრდობის განვითარების ფონდის მხარდაჭერით ხორციელდება. პროექტის ორგანიზატორია ახალგაზრდული მოძრაობა ,,დავითიანნი'' და არასამთავრობო ორგანიზაცია ,,სტუდენტური ერთიანობა''. პროექტის პარტნიორები არიან: „ვისოლ ჯგუფი", საქართველოს ეროვნული ბიბლიოთეკა და „პალიტრა L".

პროექტის ფარგლებში მიმდინარეობს წიგნების შეგროვების პროცესი მთელი თბილისის მასშტაბით.

აქტივობები 25 ივლისიდან დაიწყო. რეგიონების მოსახლეობისათვის წიგნების მიწოდებაზე ,,მოსიარულე ბიბლიოთეკა'' (სპეციალური ავტობუსი) იზრუნებს, რომელიც საქართველოს დიდ ქალაქებში გაჩერდება და დაგეგმილი ღონისძიებებისა და ცნობილი მწერლების დახმარებით იქაურმოსახლეობასაც მისცემს საშუალებას გააჩუქონ წიგნები და ჩაერთონ საგანმანათლებლო პროექტში.

„წიგნი ყველა სოფელს" გრძელვადიანი პროექტია და მაღალმთიანი სოფლების მწირი სასკოლო ბიბლიოთეკების წიგნის ფონდის გამდიდრებას ისახავს მიზნად. მოსახლეობის აქტიურობიდან გამომდინარე პროექტი სხვა რეგიონების ბიბლიოთეკებსაც მოამარაგებს და მომავალშიც გაგრძელდება.