რუსეთი საქართველოსთვის ემბარგოს გაფართოების გზებს ეძებს

რუსეთი საქართველოსთვის ემბარგოს გაფართოების გზებს ეძებს - რუსეთის სოფლის მეურნეობის მინისტრი

ბიზნესი & ეკონომიკა - 14:03, 07 Aug, 2015

3832

რუსეთის სოფლის მეურნეობის მინისტრმა, ალექსანდრე ტკაჩოვმა განაცხადა, რომ ქვეყნებს, რომლებიც ევროკავშირის სანქციას შუერთდნენ - მონტენეგრო, ალბანეთი, ისლანდია, ნორვეგია, ლიხტენშტეინი, უკრაინა და საქართველო, რუსეთი გაფართოებულ ემბარგოს დაუწესებს.
მინისტრის განცხადებით, ამ ქვეყნებიდან პროდუქციის შემოტანის აკრძალვა რუსეთს არ დააზარალებს, რადგან მათი წილი სურსათის ბაზარზე 5%-ს არ აღემმატება.
"ჩვენ მათ გარეშე გავძლებთ და ჩვენი ქვეყნის მოქალაქეები დეფიციტს ვერც იგრძნობენ. ვსწავლობთ ვითარებას, როგორ შეიძლება რეაგირება. რა თქმა უნდა, მივიღებთ ადეკვატურ გადაწყვეტილებას", - განაცხადა ტკაჩოვმა.
ზემოთ ჩამოთვლილი ქვეყნებისათვის ემბარგოს დაწესების გადაწყვეტილება რუსეთის პრემიერ-მინისტრმა დიმიტრი მედვედევმა 4 აგვისტოს მიიღო და მთავრობის წარმომადგენლებს დაავალა შესაბამისი ზომები გაატარონ.
ამასთან, რუსეთმა ქვეყნის ტერიტორიაზე შეტანილი პროდუქტების მასობრივი განადგურება დაიწყო. საუბარია იმ ნაწარმზე, რომელიც პუტინის მიერ რამდენიმე დღის წინ ხელმოწერილი ემბარგოს სიაში მოხვდა.

250 ტონა ხილი და სხვადასხვა დასახელების პროდუქტები სოფლის მეურნეობის სამინისტრომ ერთ დღეში დაწვა და ტრაქტორებით გაანადგურა.

რუსეთის სოფლის მეურნეობის მინისტრის განმარტებით, პროდუქციის განადგურების აღნიშნული ფორმა საერთაშორისო სტანდარტების შესაბამისად მოხდა.