საქართველოს ელჩი თურქეთში ირაკლი კოპტალაძე შპს ”ალგანის“ სატვირთოს ქართველ მძღოლზე თავდასხმის ფაქტს ეხმაურება.

მისი ინფორმაციით, დაზარალებული ამჟამად პოლიციის განყოფილებაში იმყოფება. როგორც ელჩი ვარაუდობს, მძღოლი საქართველოში დღეს დაბრუნდება.

„დაზარალებული პიროვნება იმყოფება ჟანდარმის ოფისში. მასთან არის მუდმივი კონტაქტი. ჩვენ ველოდებით, რომ ის უსაფრთხოდ იქნას გადმოყვანილი. მინდა მოვუწოდო ჩვენს მოქალაქეებს, რომ ამ მხარეში, სანამ სიტუაცია არ დასტაბილურდება თავი შეიკაონ ამ ტერიტორიაზე წასვლისგან“, - ამბობს ირაკლი კოპტალაძე.

ბოლო დღეების განმავლობაში თურქეთის სამხრეთ-აღმოსავლეთში, სადაც ქურთების ტერორისტული ორგანიზაციები მოქმედებს, ორი ქართული გადამზიდავი კომპანიის სამ სატვირთო ავტომობილზე თავდასხმა მოხდა.

შეიარაღებულმა პირებმა ავტომობილები დაწვეს, მძღოლები კი რამდენიმე საათის განმავლობაში დაკავებული ჰყავდათ.